المشكلات الفنية وسوء تشخيص العيوب.. هاجس يؤرق أصحاب السيارات

سرعان ما تنهار أحلام البسطاء على أعتاب الوكلاء، بالطبع نحن لا نعمم حتى لا نفهم خطأ أو يؤخذ كلامنا على محمل آخر، هناك سيارات تتوارثها الأجيال حتى الآن وأخرى يحلف بحياتها كلما جاءت سيرتها، وسيارات أخرى كانت سبب المتاعب والمشاكل لأصحابها، من هذا المنطلق كان لا بد من توضيح الأمور ووضع المواضيع فى نصابها من خلال آراء المجربين، فهم خير دليل ومنذ القدم كنا نقول دائما إن السيارة التى تعمل «تاكسى» ويشهد لها الجميع فهى سيارة عملية ومتينة ونقدم على شرائها ونحن مطمئنين لماذا لأن التجربة العملية خير دليل من الكلام النظرى ومن غير كلام كتير نعالوا نشوف كلام المجربين.

الأستاذ محمد مصطفى، يقول وكله مرارة وحزن وألم وندم: هاعرض عليكم مشكلتى مع توكيل منصور شيفروليه جنرال موتورز، اولا: اشتريت عربية شيفروليه افيو موديل ٢٠١٧ بتاريخ ١٥ أكتوبر ٢٠١٦.. ثانيا: بعد استخدام العربية لمدة أسبوع مشيت بها مسافة ٩٠٠ كيلو فقط لقيت فى صوت تكتكة فى الموتور، توجهت على الفور إلى التوكيل وقالولى ده صوت طبيعى ولا داعى للقلق طبعا صدقتهم، ثالثا: بعد ما استخدمت العربية لمسافة ٤٩٠٠ كيلو.. بشوف الزيت لقيته ناقص من الموتور وتوجهت للتوكيل، لقيتهم بيقولوا آسفين فيه أفيز كان مش مربوط كويس واحنا خلاص ظبطنا العربية.

رابعا: رحت غيرت زيت الموتور على ٧٥٠٠ كيلو.. طبعا ملحقتش آخد بالى إذا كان الزيت نقص تانى.

خامسا: بعد لما مشيت بالعربية ١٤٠٠٠ كيلو.. ببص على الزيت ملقتش زيت فى الموتور خالص.

توجهت على الفور إلى التوكيل وهناك قالوا هنكشف عليها، وبعد كده لقيتهم بيقولوا هنظبط العربية... طبعا عشان أنا شخص فاهم قولتلهم مفيش الكلام ده وإن الموتور ده فيه مشكلة ولازم يتغير.. ساعتها بس صارحونى إن فعلا الموتور محتاج تغيير عشان هو خفيف وبيحرق الزيت.. والعربية بقالها خمس أيام عندهم مستنين جنرال موتورز يرد عليهم.

أنا دافع فلوس فى عربية زيرو مش عشان أعطل كل شوية وأقضى حياتى فى التوكيل.

والمفاجأة أننا اكتشفنا إن الموتور متعمرش وقطع الغيار القديمة ليست خاصة بالسيارة.