غلوشيات رمضانية #19 رمضان.. يكتبها عبدالله غلوش: ليلة الدوري 38.. تفتكروا الزمالك ممكن ياخد الدوري رقم 38 في تاريخه سنة كام؟.. -فوق مستوي الشبهات.. مشهد وفاة والدة يسرا.. أول مرة أحس بدور عمرو مصطفي

#١٩رمضان

-ليلة الدوري 38.. في تلك الاثناء يحضرني مقولة خالد الذكر، الدرع هايفضل في ميت عقبة الـ ١٠ سنين الجايين.

-ليلة الدوري 38.. الأهلي لعب حلو في ماتش المصري وخسر ولعب وحش النهارده وأخد الدوري.

-ليلة الدوري 38.. فضيحة النقل التليفزيوني للمباراة ، لو حصلت في تليفزيون أي دولة محترمة، المفروض يتم اقالة رئيس اتحاد الإذاعة والتليفزيون قبل الماتش ما ينتهي.

- ليلة الدوري 38.. مفيش أسوأ من قناة المفروض محترمة وعشان الفلوس تسمح تمشي علي شاشاتها ناموس وصراصير وسط المبارايات.

- ليلة الدوري 38.. فوز الإسماعيلي علي الزمالك رايح جاي الموسم ده، الحاجة الوحيدة اللي هاتخليني معلقش علي شغل العيار الصغيرة اللي حصل من جهازهم الفني وبعض مسئوليه قبل واثناء المباراة.

- ليلة الدوري 38.. تفتكروا الزمالك ممكن ياخد الدوري رقم 38 في تاريخه سنة كام؟

- بعد ٣ أيام من وفاتها في "الخانكة"، سميرة عبدالعزيز توفت من شوية في "ابوالبنات".

- يوميات زوجة مفروسة.. اللهم ارزقنا ثقة خالد سرحان في تقل دمه.

- راس الغول ..لاول مرة من بدايه رمضان 6 مشاهد تعدي في حلقة واحدة من غير ما محمود عبدالعزيز يظهر في واحد منهم.

- من الاسئلة اللي مش لاقي لها اجابة من أول رمضان.. هي ليه شريف بيظهر في كل بوسترات الدعاية الخاصة بمسلسل "الخروج" بشنب مع انه في المسلسل طالع من غير شنب؟

-فوق مستوي الشبهات.. مشهد وفاة والدة يسرا .. مفيش أحساس أصدق من كده.

-فوق مستوي الشبهات.. مشهد وفاة والدة يسرا .. أول مرة أحس بدور عمرو مصطفي في المسلسل.

-فوق مستوي الشبهات.. كل اللي حسدوا شيرين رضا علي شيكاتها واناقتها ، احب اقولهم ان بقالها ٩ حلقات بنفس الطقم.

-فوق مستوي الشبهات.. عن الصفاء النفسي للبنت اللي كانت نايمة مع احمد حاتم وهي بتقوله "لو بتحب ماتبقاش تكلمني تاني، لأن كل اللي يمهني انك تبقي مبسوط حتي لو مع واحدة غيري".

- سعد الصغير احيي من ٣ ايام حفل زفاف مصطفي شعبان "ابوالبنات"، وامبارح احيي زفاف باسم سمرة في الكيف.. الأول اخد فيه فلوس والتاني عمله مجاملة.

-لو البنك المصري الخليجي عايز يطفش العملاء بتوعه، مش هايلاقي أسوأ من فكرة اعلانات شيكو وهشام ماجد بصراحة.

-جراند أوتيل.. مشهد ولادة دينا الشربيني، واحد من أصدق مشاهد الولادة في السينما والدراما المصرية عبر تاريخها.

-جراند أوتيل.. من الظلم عبارات الإشادة للعنصر الرجالي في المسلسل تقتصر علي محمد ممدوح بس ، لأنه بصراحة مش أقوي من أحمد داوود.

-ونوس.. انتبه من فضلك المسلسل يرجع إلي الخلف.

-سقوط حر.. بمنتهي الأمانة اللي عاملة او اللي عامل دور المتحولة جنسيا في حلقة النهارده ، من كتر اتقانها للدور ، مخلياني لغاية اللحظة دي مش عارف إذا كانت بنت فعلا في الحقيقة ولا ولد؟

-سقوط حر.. فاهم ان المسلسل عايز يقول ان كل واحد فينا بينه وبين الجنون شعره ، لكن للأسف أقوي نقط ضعف المسلسل انه مقدرش يوصل الرسالة دي للناس ، لأن ببساطة كل قصص الحالات اللي مشاركه المسلسل يتم تناولها من فوق الوش، من غير ما تعيش فيها ولا تتوغل في تفاصيلها زي ما كان بيحصل في مسلسلات نيللي الأخيرة زي سجن النسا وتحت السيطرة.

-"تكنو موبايل" بينافس "فريش" علي لقب ابسط فكرة وألطف إعلان.

-سناء شافع لو بيعمل دوبلاج مسلسل كارتون، مش هايعمل اللي بيعمله في مسلسل "القيصر" ده.

-أبوالبنات.. من المسلسلات النادره اللي يمر ١٩ حلقه منها، من غير عبدالرحمن ابوزهرة ما يموت.

-كيف تصبح اسطورة في ٥ خطوات؟.. تتجوز ٣، تتاجر في السلاح والآثار، تظبط نفسك مع واحد تقيل في الداخلية، تجيب سكرتيرة وتدفع لها ٢٠ الف دولار في الشهر، تنزل تصور الناس وهي بتتفرج علي المسلسل بتاعك في القهاوي وتحطها علي صفحتك في الفيسبوك.

-الأسطورة.. أكيد مي عمر لما سألت محمد سامي هو أنا دوري في المسلسل عبارة عن ايه؟ ، قالها هاتصوتي في وش روجينا كل ما تشوفيها يا حبيبتي.

-الخوف مرتبط دايما بالفهم .. بيومي فؤاد "الميزان".

- ربنا يفرح قلبك ويسترك ستر مايوجعش غيرك .. سهر الصايغ "يونس ولد فضة".

- لو جبتي full mark في امتحانات المدرسة هاعلمك الرقص.. صافينار لبنت مصطفي شعبان "ابوالبنات ".

- ربنا يرحمك يا أمي ويرحم أمهاتنا جميعا ويخلي أمهاتكم يارب.