محمد رمضان: "أمي كانت بتفصل ملابس للجيران وبيتنا كان صغير 70 مترا تقريبا وفيلم عبده موته كسر السينمات"
الإثنين، 02 يناير 2023 02:44 م
محمد رمضان
ريهام عاطف
أثار الفنان محمد رمضان، حالة جدل على مواقع التواصل الاجتماعى، بعد التصريحات التى قالها خلال ظهوره الخاص فى برنامج "معكم"، الذي تقدمه الأعلامية مني الشاذلي، والذي كشف فيه محمد رمضان ،عن الكثيرمن تفاصيل حياته الخاصة والفنية.
وبدأ النجم محمد رمضان، حلقة البرنامج، بأغنية "ثابت"، وسط هتاف كبير، من الحضور في الاستديو، وقال: "اللى فات بلطى واللى جاى جمبرى".
محمد
حياة محمد رمضان
وقال الفنان محمد رمضان، خلال برنامج "معكم"، إن الدتي كانت تفصل ملابس للجيران، حتى تساعد في زيادة الدخل وتلبيه متطلبات الأسرة، بجانب كونها ربة منزل، قائلا: "أمي كانت بتفصل ملابس وكان بيجي لها ستات كتير، والستات بطبعهم بيحبوا الكلام، وبيتنا كان صغير 70 مترا تقريبًا، وكنت بسمع قصص الستات دي وأنا بذاكر".
وأستطرد محمد رمضان، قائلا : "من القصص دي حكايات بضحكني، وفيه منها ممكن أبكي على ست بتحكي لوالدتي حكايتها، وأكون قاعد بذاكر والاقي نفسي عيطت عن واحدة باعت دهبها علشان تقف جمب جوزها وتعمل له مشروع، وبعدها اتجوز عليها وسابها، وتاني يوم في المدرسة افتكر الست".
محمد رمضان في معكم
محمد رمضان والتمثيل
وعن حبه للتمثيل، قال محمد رمضان: "من وأنا صغير بحب التمثيل، مش عارف أخدته منين، مفيش حد في عيلتنا غاوي تمثيل أو فن، ومن وأنا صغير بلقط حاجات كتير وأحكيها لأمي، وأقلدها، وأمي لمست فيا من وأنا صغير أنى عندى موهبة".
وأشار محمد رمضان، إلي أن هناك العديد من الصعوبات والعقبات، واجهته طوال مشواره الفني، مؤكدًا أنه كان لا يلتفت لأي آراء سلبية في البداية أو قصص فيها فشل أبطالها، وذلك حتى لا تؤثر على طموحه.
الفنان محمد رمضان
وعن أول جائزة حصل عليها، قال محمد رمضان: "خدت أفضل ممثل موهوب، على مستوى الجمهورية بمسرح المدرسة في أولى ثانوي، وأنا طموحي سريع، ووقتها قلت مسرح المدرسة مش مكاني، وروحت للمخرج وقلت له أنت عظيم، لكن أنا عاوز أقابل المخرجين اللي بجد بتوع التليفزيون والسينما، قال لي أنزل وسط البلد وسابني ومشي، وخدت منه الكلمة وروحت محطة الأتوبيس بعد عشر دقايق، وكنت متخيل إن وسط البلد هو المكان اللي فيه كل الوسط الفني، ودخلت عمارة عمارة واسأل البواب هل فيه مكتب منتج أو مخرج هنا، ولما أتعب أروح وأجي تاني يوم أكمل".
وتابع محمد رمضان: "من هنا بدأت الرحلة وما يأستش، وكنت بصبر نفسي، وكان في إيدي كوز الدرة أتخيله أوسكار، وأتلكم بصوت عالي، واتخيل إني بقيت نجم وممثل، وكنت مؤمن بحلمي ونجاحه".
وأضاف محمد رمضان: "أنا عاوز أقول إن أنت قادر تسلي نفسك، حتى لو بتتعب علشان توصل لهدف طالما حلمك، ومدام بتتعب في شيء بتحبه، سميه تسلية ما تسميهوش تعب، واعتبر نفسك بتسعى وراء شيء جميل".
رمضان
وقال محمد رمضان: "أنا كنت مصدق وعلى يقين إن في يوم من الأيام هحكي حكايتي في برنامج، وأنا قاعد قدام أهم إعلامية في مصر، والقعدة دي أنا تخيلتها وأنا قاعد على رصيف، ومستني منتج علشان السيكيورتي رفض أن أطلع له المكتب، وأتخيل الحاجات دي، وإني نجحت وقاعد في برنامج وبحكي أني كنت قاعد على رصيف ومستني المنتج، والجمهور يقول معقول محمد رمضان كان بيقعد على رصيف".
وأكد محمد رمضان، علي صدق موهبته قائلا: "كنت أزعل جدًا لما بقدم موهبتي لشخص يعاملني وحش، أقوله على فكرة، أنا اه هستفاد منك لكن أنا ثقة في ربنا هفيد حضرتك وهعمل الدور أحسن ما حضرتك تتخيل، أنا فعلًا درست إمكانياتي وحسيت إني أستحق المكان ده وصدقت".
محمد رمضان وأزمته مع الطيار
وقال الفنان محمد رمضان، عن أزمته مع الطيار أشرف أبو اليسر، رحمه الله: "زعلان إني تسببت له في شيء قاسي، لكن دي فرصة أننا في هذا اليوم نترحم عليه، وإحنا بنتعلم من أزماتنا".
وتابع محمد رمضان، قائلا: "أنا زي الجمهور، فوجئت بهذا القرار القاسي، بوقف شخص مدى الحياة، معرفش قانون الطيرن، كنت أتمنى القرار يتخفف شوية، حاولت بكل الطرق حل الموضوع قبل التصعيد، ويكون قضية رأي عام، لكن محصلش نصيب، أنا بعترف إن أحيانًا كتير، مش بنعرف ندير أزماتنا بشكل سليم".
وأضاف محمد رمضان: "القضاء أنصفه الله يرحمه، وحكموا عليا بتعويضه بمبلغ مالي، وأنا بكل التسامح والرضا وصلت المبلغ لأسرة الطيار، واحنا في بلد عادلة، وفي قضاء عادل، وأنا راضي إنه اتحكم عليا ودفعت المبلغ بكل الحب والرضا والتسامح، لكن المبلغ ما عوضوش أنه يتوقف مدى الحياة.
واختتم محمد رمضان، حديثه عن أزمته مع الطيار أشرف أبو اليسر، قائلا: "لكن أنا عملت اللي عليا، وكنت اتمنى لو كان ينفع أروح للجهة اللي فصلته وأعمل أي شيء في سبيل يستعيد وظيفته، وفي النهاية مدام القضاء حكم ضدي، يبقى أخطأت، أنا مش دارس قانون، والموضوع راح للمحكمة، وأنا راضي وواثق في قضاء بلدي وأتحكم بالمبلغ ودفعته".
محمد رمضان و الطيار
محمد رمضان وفيلم عبده موتة
وتعليقا على الانتقادات التي تعرض لها بسبب فيلمه الشهير عبده موتة، عام 2012، قال الفنان محمد رمضان: "عملت عبده موتة وكان عندي 24 سنة، لو رجع بيا الزمن مستحيل أعمله بنفس الشكل، لأن عقلي بقى أنضج وبقى عندي رؤية أشمل، وتفاصيل أكتر، لكن أنا ما كنتش متوقع أن هيشوفوه كم الناس دي، ويكسر السينما، والسينمات تفضل شغالة 24 ساعة على الفيلم، وبعد يومين من عرضه، السينمات اللي كانت رافضة تاخدوا، يطلبوا ياخدوه علشان فيه إقبال كبير".
وتابع محمد رمضان: "أنا عارف إن جمهور كبير بيشوفني وبدخل بيوت ناس، وبشكل جيل وبأثر في جيل، ولو رجع بيا الزمن كنت هعمل نفس القصة بطريقة تانية، ويبدو حسن النية في نهاية الفيلم، لأن عبده موتة أتعدم صغير ومطلعش منتصر".
محمد رمضان عبده موته
واستكمل محمد رمضان: "أنا رؤيتي اتغيرت وما كنتش أعرف أنا هبقى فين عند الجمهور، وفي 2012، قبل ما أقدم عبده موتة، كنت ماضي بطولة مطلقة لفيلم أسمه الألماني، وفيلم ساعة ونص عامل فيه 4 أو 5 مشاهد، وفيلم حصل خير مع كريم محمود عبد العزيز وسعد الصغير، علشان أقول للجمهور أنتم ما تعرفونيش أنا ممثل طالع من وسطكم بقدم لكم نفسي، وأنا كبطل وبقدم بطولة جماعية، وبقدم 5 مشاهد فقط، ولقيت العرض اللي جالي بعد الـ 3 أفلام دول، بطولة فيلم عبده موتة، يبقى الجمهور والسوق عاوز يختارك.
وأشار محمد رمضان، إلي أن المنتج نفسه لو عمل الفيلم النهارده، هيعمله بمواصفات أخرى، وهيبقى ميزانيته أكبر، وأنا هفكر إن العقاب يكون من بدري، لأن الناس عندها حق والدليل إني حاولت أعمل أدوار مختلفة، زي شد أجزاء والكنز وابن حلال".
محمد رمضان ومشاهير اسرائيل
وعن ظهور محمد رمضان، مع مشاهير اسرائليين، وتعرضه لأنتقاد لاذع واتهامه بالتطبيع، قال: "لما أنا دخلت الاستديو فيه كم ناس اتصورت معاهم بود وحب، وحاسس أنهم شركاء في نجاحي، ولنفترض إن فيهم شخص إسرائيلي، أنا هعرف منين، هما نفس الشكل، وأنا ما أقدرش أحرج قطاع كبير من جمهوري بقابله بود وحب، ويجوز فيهم شخص قاتل، ولسه ما أتمسكش، أو بينتمي لشيء أنا ضده، علشان كده أنا استغربت".
واستكمل قائلا: "وقتها كنت في عشاء بمطعم، وأتصورت مع ناس كتير بتلقائية، والموضوع بقى ضخم وأصبح رأي عام، وضحكت لما لقيت صور لناس كتير، ممثلين متصورين مع إسرائيليين، والبعض قال اشمعنى محمد رمضان، وأنا ما أتوقفتش من النقابة، لكن كان تحقيق والحمد لله عمر ما تم إيقافي، ما حصلش ولا مرة، وتقبلت التحقيق بصدر رحب، وقعدت معاهم، وقلت لهم الإيجابات الحقيقية، وعملت مسلسل في نفس السنة، ولما كلمت النقابة، ضحكت، وقلت لهم هل أنا كل شخص بتصور معاه هسأله أنت مين ولا بلدك إيه؟، أنا بتصور مع الآلاف، ما أقدرش أعرف انتماءاتهم وجنسيتهم ودينهم".
محمد رمضان مع اسرائليين
أنتقاد محمد رمضان
أوضح محمد رمضان، أنه يضع نفسه مكان الجمهور في بعض المواقف، قائلا: "أنا بعذر الجمهور برضه، لما انتقدوا أغنية نمبر وان، حطيت نفسي مكان الجمهور أو الزملاء، وقلت لو صحيت ولقيت واحد بيقول كده هزعل واضايق طبعا".
وعن أنتقاد ملابسه الغريبة التي يرتديها في كثير من المناسبات، أكد رمضان، أنه يرتدي ما يناسب الحدث، بينما في حياته العادية يرتدي مثل أي شاب في سنه، قائلا: "اللبس الغريب ده في الحفلات بيبقى جزء من الشو والبهرجة الزيادة، إنما في الحياة العادية لبسي بسيط وشبه لبس كل الشباب"، مشيرا إلي أن التيم الذي معه، يختار له ملابسه حسب كل إيفينت، قائلا: "يعني لو عندي إيفينت ليه علاقة بأفريقيا، بيبقي معايا ستايسلت أفريقي، ولو حفلة في المغرب يبقي ستايلست مغربي، وهكذا".
نمبر وان
غناء محمد رمضان
وقدم النجم محمد رمضان، خلال حلقته مع منى الشاذلى، أغانى من عدة أفلام، بدأها بأغنية كابوريا للراحل احمد زكى، وقال ربنا يرحمه، وأغنية الأراجوز للراحل عمر الشريف، وأغنية فيلم البيه البواب، وسط هتاف كبير من الجمهور داخل الاستديو.
وأكد محمد رمضان، على أنه يحب تقليد عدد من الفنانين، منهم عادل إمام وكمال الشناوى، الذي يمتلك بصمة خاصة، كما قلد الراحل الفنان محمود المليجى.
محمد رمضان وأبنائه
محمد رمضان وافتكروني مجنون
علي الجانب الأخر، فاجأت كنزي، ابنة الفنان محمد رمضان، والدها، من خلال إعلانها عن أغنية جديدة له، مع مطرب برازيلي، من المقرر طرحها الفترة المقبلة، وهي تحمل عنوان افتكروني مجنون.
وردت كنزي ابنة محمد رمضان، على سؤال الإعلامية منى الشاذلي، بشأن أقرب أعمال الغنائية لوالدها إلى قلبها، وقالت: "بحب أغنية افتكروني مجنون، أغنية جميلة ودي أكتر أغنية أنا بحبها جدًا".
كما أعرب الفنان محمد رمضان، عن سعادته الكبيرة، بتعاونه مع المطرب الكبير، أحمد عدوية، ونجله محمد، في أغنية جديدة، تحمل اسم "على وضعنا"، وقال: "أغنية على وضعنا لايقة جدًا على كل مصري وعربي، لأن إحنا عندنا تاريخ جبار".
وقدم رمضان، مقطع من الأغنية لأول مرة، مشيرا إلى أنه يفتخر بالتعاون مع الفنان محمد عدوية، متمنيًا أن ينال العمل، إعجاب جميع محبيه بمصر والوطن العربي.
محمد رمضان وعدوية
أخر أعمال محمد رمضان
ومن المقرر أن يعرض خلال شهر رمضان، للفنان محمد رمضان، مسلسله الجديد "جعفر العمدة"، قصة محمد سامى، ويشارك في السيناريو والحوار مهاب طارق، وإخراج محمد سامى، وبطولة محمد رمضان، زينة، هالة صدقى، إيمان العاصى، مى كساب، منة فضالى، أحمد داش، بيومى فؤاد، فريدة سيف النصر، عصام السقا، جورى بكر، أحمد فتحى، طارق النهرى، مجدى بدر، طارق الدسوقى، وعدد آخر من الفنانين، وتدور الأحداث في اطار اجتماعى شعبى.
ويصور الفنان محمد رمضان، المشاهد الداخلية فى مدينة الإنتاج الإعلامى، حيث يصور فريق العمل، عدة مشاهد داخل منزل والدة محمد رمضان "وصيفة"، والذى تقدمه الفنانة القديرة هالة صدقى، ويعد ديكور مدينة الإنتاج الإعلامى، هو الأساسى للمسلسل الذى ينتظره الجمهور.
