عميد لاعبي العالم يزور مريم فتح الباب الحاصلة على المركز الأول بالثانوية

زار عميد لاعبي العالم، أحمد حسن، لاعب الأهلي والزمالك وكابتن المنتخب المصري السابق، الطالبة مريم فتح الباب، الأولى على الثانوية العامة، والحاصلة على 99%. 

وقال أحمد حسن، عبر صفحته الشخصية على موقع التواصل الاجتماعي،«فيسبوك»:«حابب اتكلم عن نموذج مشرف ومحترم وهقول اللي أنا حاسه وهتكلم من قلبي، عن قصة مريم ونجاحها في الثانوية بنسبة 99% وهي بنت حارس عقار بسيط، ولكنه كبير مقامًا وعفيف النفس اتصلت مباشرة علي سامي ، وشوفت اد اية مريم فخورة بأبوها وأمها واهلها كلهم ، وهم دول فعلا اللي يتقال عليهم ولاد الناس مش زي ما المجتمع المريض بيصور الناس دايما بالمظاهر الكدابة هما ولاد مين وللا لابسين اية وللا راكبين اية ، وده للأسف اصبح حال مجتمعنا الردئ».

وأضاف حسن: «بس ولاد الناس الحقيقيين هما اللي عرفوا يربوا ولادهم ، ولاد الناس هما اللي بيحافظوا علي قيمهم ومبادئهم وأهاليهم ، ولاد الناس عمرها ما كانت بالمظاهر الكدابة وبما اني ده مجتمعنا واصبحت دي نظرة المجتمع، وفنفس الشئ ينطبق علي اعلام اعمى عن رؤية النمادج المشرفة، تفتكروا حد النهاردة هيجري ورا مريم ويدفعلها فلوس عشان يستضيفها ويطلعها كنموزج مشرف فهي بنت حارس العقار البسيط وعندها اربع اخوات وفي غرفة واحدة قدرت تتحدى كل الصعوبات دي وتجيب 99%».

واستكمل عميد لاعبي العالم:«اكيد محدش هيعمل كدة عشان اصبحنا في زمن التفاهات والهلس ، نموذج زي مريم اكيد ما يجروش وراه ، لكن طبعا يجروا ورا نماذج التعري التانية ، اللي كل ما تتعرى اكتر يدفع لها اكتر ، فتتعرى أكتر فيدفعلها تاني أكتر، وللأسف هو ده بقى حال مجتمعنا واعلامنا، طب ما أنا عندي فكرة ما نقدم نموذج زي مريم ويبقى عندنا نموذجين نموذج للتعري ونموذج محترم تحدى كل الصعاب ونسيب الناس هي اللي تختار، ومش كدة وبس دا المفروض انهم يجروا علي مريم ويدفعولها بالدولار وهي اللي تتنك عليهم لأن مريم هو النموذج المفترض اللي نقدمه لولادنا ومجتمعنا علشان ننشئ مجتمع سوي مش نقدم النماذج الهلس،، مبسوط جدا النهاردة أن أنا زرت العيلة دي وانا فخور ببنت زي دي وبعيلتها».