شقيق صاحب «القارب الغارب» بكفرالشيخ..«حاسبوا المسؤلين قبل ماتحاسبوا اخويا اللى مات»..مستعد للمساءلة رغم عدم مسؤليتى..المركب يحمل تصريح لأخر يناير الجارى..والمحافظة: التراخيصه منتهية منذ 5 مايو الماضى

بصوت يملؤه الألم والحزن ليس على وفاة شقيقه انور محمد الصياد، الذى ترك وراءه ولدين فقط، إنما على وفاة الـ15شخص من أهالى قريته والتى يرتبط أهلها بعلاقات نسب ومصاهرة، طالب خليل محمد، شقيق صاحب المركب التى غرقت انه يجب محاسبة المسؤلين فى وزارة النقل النهرى قبل محاسبة أخى الذى لقى مصرعه فى الحادث.

وأضاف خليل، أنه مستعد للمساءلة بدلًا من شقيقه حال إدانته، مؤكدًا أن المركب لها تصريح من 1نوفمبر 2015 حتى نهاية يناير الحالى قائلًا: «لو انا أوراقى مش سليمة مكنتش وزارة النقل منحتنا رخص سير لمدة 3شهور»، مضيفًا أن المركب مرخص من 40عامًا باسم والده المتوفى منذ أكثر من عام ونصف العام.

مفيش رقابة

تابع محمد، «الحادث قضاء وقدر والناس ماتت خلاص، سيبوا اللى حصل وبصوا إزاى تمنعوا الكوارث اللى جاية، مش إحنا المسؤلين، فين الرقابة والناس اللى بتاخد فلوس وبترخص، فوقوا وامنعوا الكوارث اللى ممكن تحصل، إحنا قلبنا محروق على كل الناس اللى ماتت، أخويا مات وفى لحظة ترك زوجته مراته وأطفاله يوسف 6سنوات ومريم 3سنوات مين اللى هيربيهم».

وأوضح محمد، قائلًا: «مين المسؤل عن وفاة أخويا قبل الناس اللى مات دول 15روح ونحتسب ده عند ربنا، إحنا ناس غلابة بناكل اليوم بيومه، ولو قعدنا يوم منلقيش ناكل تانى ومع ذلك بنحب بلدنا، وبلاش نحمل الناس اللى ماتت المسؤلية ولو حتى فيه رخص لكل المراكب هل ده هيمنع الموت».

وأكد محمد، على ضرورة وجود رقابة لمنع هذه الكوارث المتكررة، قائلًا: «انا مستعد أضحى برقبتى فى سبيل أن اللى راحوا يرجعوا».

"عاوزين حقنا"

اضاف شقيق صاحب المركب المتوفى قائلًا"احنا فى كارثة وإسألوا اهل الاختصاص بيدونا رخص ليه ورغم انى مليش فى الموال ده اللى كان ليهم راحوا وماتوا وفيه ناس كانت رايحة تنقذ الضحايا ماتوا كمان،البلد مش متحملة، وفيه لجان للتحقيق توضح الحقيقة،عاوزين نتقى ربنا ومش هتكون اول ولا اخر حادثة،المعدية بين قريتين والشاطئين يبعدوا عن بعض 600متر والحادث حصل قبل الشط ب10امتار.


منتهية التراخيص

وكان اللواء السيد نصر، محافظ كفرالشيخ، قد أكد إن المعدية المتسببة فى الحادث «مركب صيد»، وترخيصها متوقف منذ 9مايو الماضى، وتسببت الحمولة الزائدة وسوء الأحوال الجوية فى غرقها، مشيرًا الى ان طول المركب 6 متر فى عرض 2 متر حديد بمجاديف حمولته المقررة 6 افراد بالاضافة لفرد التشغيل، وأن حمولتها الزائدة التى وصلت الى 18 فرد هى السبب فى وجود 15 ضحية و3 نجاة.

وأصدر نصر، قرارًا حمل رقم " 1 " لسنة 2016م، بوقف مدير الادارة الهندسية بالوحدة المحلية لمركز ومدينة فوة، وشمل الوقف الكاتب الادارى بمكتب الملاحة الداخلية بالوحدة المحلية لمركز ومدينة فوة، وقفًا احتياطيًا ولمصلحة التحقيق وبحد أقصى ثلاثة أشهر، أو لحين انتهاء النيابة الادارية بالمركز من التحقيقات معهم، أيهما أقرب.

ونص القرار على الوحدة المحلية لمركز ومدينة فوة إخطار المحكمة التأديبية المختصة بحالة الوقف تطبيقًا لنص المادة رقم " 60 " من القرار بقانون الخدمة المدنية 18 لسنة 2015م ولائحته التنفيذية، مع إحالة كافة ألاوراق الى النيابة الادارية بفوة لإجراء التحقيقات.


غير تابعة للنقل



فيما أكدت الوزارة فى بيان لها أن المعدية غير تابعة للوزارة، وأنها مركب بمجداف بدون موتور ولا يوجد فى هذه المنطقة مراكب تابعة للوزارة سوى ثلاث فقط متحفظ عليها جميعا فى شرطة المسطحات المائية، بعد أن قامت هيئة النقل النهرى بإيقاف هذه المراكب الثلاث لعدم صلاحيتها فى العمل فى نهر النيل.


يذكر ان قرية سنديون التابعة لمركز فوه، شهدت غرق مركب يعمل «معدية» منتهي الصلاحية، خلال الأسبوع الماضى، ما بين قرية سنديون، وقرية ديروط التابعة لمركز المحمودية بمحافظة البحيرة، فى مياه نهر النيل فرع رشيد، والذي كان يقل على متنه 20 شخصا مما ادى لمقتل 15شخصًا بينهم اثنين من محافظة البحيرة.