علي حميدة: ديكابريو متعقد مني بعد ما رفضت التمثيل في تيتانيك.. ومحمد منير "ما سألش فيا"

قال الفنان علي حميدة إنه قدم أعمالا في الدراما والسينما وله بصمة فيها، ومنها فيلم لولاكي ومولد نجم إلى جانب 4 أعمال درامية أخرى.

وأضاف علي حميدة قبل مرضه: "ديكابريو متعقد منى بعد ما رفضت البطولة في فيلم تيتانيك لأن الدور كان محتاج للعموم فى المياه المتجمدة، وأنا مش بحب المياه المتجمدة".

وأضاف أن شريط لولاكى حقق مبيعات 80 مليون شريط، بعدها اشتريت شقة على النيل في الجيزة بالقرب من المكان الذي كنت أنام به على الرصيف.

وتابع: "القدر غريب.. فجأة طلع عليا ضرائب 13 مليون ونص بعت الشقة و3 عربيات وفيلا فى مطروح وأرض عشان أسدد الضرائب، وبعت كل ما أملك ورجعت تانى أنام على الرصيف بس فى عربية جيب كانت عندى".

وأضاف "مفيش حد ساعدنى خالص، وحطيت هدومى عند مدير أعمال لغاية ما اشتريت شقة، ومفيش حد رفع سماعة التليفون عليا وسأل فيا وقت أزمتى.. أنا بعتب على النجم محمد منير حبيبى صديقى، وكان بيجى عندى البيت وبروح عنده، يمكن لطيفة وحميد الشاعرى اتصلوا بيا".

وأكد أن كل ما حصل عليه نظير أغنية لولاكى كان 20 ألف جنيه وبالقسط، وتابع: "الراجل كان أبخل مخلوق شفته فى حياتى ولما كان بيعزمنى أنا وأصحابى يقولى تعالى الغدا عندى بكره وهات 5 كيلو لحمة وانت جى".

وأضاف على حميدة أن أغنية لولاكى كانت نعمة ونقمة فى نفس الوقت، مشيرا إلى أن الشريط طلع الساعة 9 يوم 14 يوليو، والساعة 11 مكنتش أقدر اتحرك فى الشارع اتشهرت فى 3 ساعات، وحميد الشاعرى قالى لو حد غيرك كان اتجن.