«حساسين» يهاجم الكينج.. و«طعيمة» يرد: ما تزايدش على وطنية منير

هاجم الإعلامي سعيد حساسين الكينج محمد منير، بسبب عدم إلغاءه لحفله الذي أقيم مساء أمس السبت بأستاد القاهرة، مشيرًا إلى أن هناك حالة من الحداد على ضحايا الطائرة المصرية المنكوبة، فكيف يمكن إقامة حفلات.

وعلق حساسين من خلال حلقة برنامجه «انفراد» قائلًا: «اتقي الله في مصر تعمل حفلة، وتلم الناس، وتقعد تغني، والبنات ترقص، حتى لو أنت متعاقد على الحفلة دي من شهر ولا اتنين بلاها الحفلة».

وتابع: «الناس في باريس وكل الدول عاملة حداد على الطائرة المصرية، واحنا اللي طيارتنا، اتقي الله، مجتش على حفلة تاخدلك فيها 100 ولا 200 ألف جنيه، راعي شعور أهالي الضحايا»، مضيفًا: «يا عيني يا خويا ارحمونا بقى، طهقتنا في عشتنا، إيه مبقاش في عقل خلاص، النهاردة ليلة النصف شعبان كنت صلتلك ركعتين، إرحموا أمنا بقى، تعبتم أعصبنا، حاجة تقرف، جاتكم البلاوي مليتوا البلد».

وأثارت الحلقة غضب الشاعر أمير طعيمة، والذي علق عبر حسابه الرسمي قائلًا: «تعليقًا على فيديو الكائن ده بتاع الأعشاب.. مقدمة ضرورية: أنا طبعًا مش مع الاحتفال بأي شيء اليومين دول، ورغم نزول أغنية «واحدة كاملة» لأنغام من كلماتي، وهي أغنية مهمة بالنسبالي، أجلت أني أشيرها على حساباتي لمدة الـ٣ أيام الحداد، وكنت أتمنى إنها ما تنزلش أصلًا بس ده مش قراري.. ولكن:

١- إلغاء حفل قبل موعده بـ٢٤ ساعة مش بالسهولة اللي حضرتك بتحضر بيها أعشابكـ ودي بيوت مفتوحة وناس دافعة فلوس وفيلم أكبر من إن عقلك يستوعبه، وأنا مش شاكك إن منير نفسه كان يتمنى يعمل كده ومنفعش.

٢- بحسبة الوزن النسبي لو حطينا محمد منير اللى هو كنج غصب عنك في كفة، وحطيناك في كفة.. كأننا بالظبط بنوزن حوت في مقابل نملة.. نملة مش عارفين طلعت لنا من أنهي خرابة وإيه مقوماتك عشان تبقى عضو مجلس شعب وتقدم برامج كمان.

٣- ما تزايدش على وطنية محمد منير لأن محمد منير قدم لبلدك اللي لا إنت ولا ألف بتوع أعشاب زيك قدموه، محمد منير زرع فينا وفي أجيال كتير الذوق والإحساس والانتماء للوطن من أيام ما كنت إنت حساسين صغير وبتعمل بيبي على روحك، محمد منير اسم بنفخر بيه في كل مكان في العالم مش بس في الوطن العربي، ولو قلت لأي واحد في العالم حساسين بيتريق على محمد منير، هيقولك يعني ايه حساسين الأول، وغالبًا مش هنلاقي رد.

٤- إسمها بلاها -بالفتحة- مش بلاها -بالكسرة- يا مذيع يا جامد.. وإن كنت اتفق معاك إن الفيديو ده من أوله لأخره بلاهة فعلًا.

٥- ودي معلومة ممكن تضايقك أكتر: محمد منير ما بياخدش ١٠٠ ألف جنيه في الحفلة يا حساسين.. ده محمد منير يا إبني.

٦- حفلات محمد منير مش رقص وهلس زي ما عقلك الصغير متخيل.. الجمهور اللي بيروح لمنير بيروح عشان يسمع شبابيك وشجر الليمون ومن أول لمسة وحدوتة مصرية واتكلمي، وعشرات من الأغاني اللي أقل أغنية فيهم أهم من اللي إنت ممكن تكون عملته وهتعمله في حياتك.

٧- معلومة ناس كتير ما عرفوهاش: منير لما أخوه توفاه الله كان عنده حفلة بعدها بكام يوم وملغهاش، وكان بيغني وهو بيبكي، لأن الفن عند منير حاجة تانية خالص ممكن أقعد سنين عشان أفهمهالك ومش هتفهمها برضه، تفتكر منير مزعلش على أخوه زي زعلك على حادث الطائرة.

٧- انت ريحت منير واللي بيحبوه لأنك قلت إنك مبقتش بتحبه وبتحترمه.. أصل ما ينفعش جمهور منير يتحط في خانة واحدة معاك يا حساسين، يعني لو رجعت تحب منير تاني قلنا عشان يا هو يعتزل يا إحنا نبطل نسمعه.

٨- لما تتكلم عن منير حتى لو فيه مبرر للنقدـ وهو إل حد ما موجود من وجهة نظر البعض، تتكلم باحترام.. إنت بتكلم محمد منير يا ولد -بصوت السادات-.

٩- مصر اللي مش عجباك عشان منير دي يا حساسين، منير من الحاجات الحلوة اللي فيها، الحاجات الحلوة قوي، ولما الأقزام عشان أكل العيش يضطروا يتكلموا عن العمالقة لازم يختاروا ألفاظهم.. يا حساسين.. بس هو فعلًا يعني ايه حساسين يا حساسين؟.

واختتم كلامه قائلًا: «ربنا يرحم ضحايا الطائرة ويتقبلهم شهداء ويرحمنا إحنا كأحياء بنضطر نتكعبل في اللي زيك يا حساحساحسا.. اتشششششششي.. معلش الفلفل خلاني أعطس، بقت ماشية بـ....... أكمل مكان النقط».