وصلة روح

الخميس، 25 يوليو 2019 09:52 م
وصلة روح
هبة العدوي تكتب:

أنا محتاج .. أنا ليا (حاجة).. يالا نخرج.. يالا نجري أكتر عشان محتاجين حاجات؟ 
 
هيه إيه (الحاجات ) ديه ؟.. وياتري مهمة فعلا ولا (الوعي الجمعي) فرض علينا (حاجات) مش محتاجينها حقيقي؟ 
 
***
تنتشر كل يوم المولات، كايرو فيستفال (مول السعادة ).. ومول مصر ( وكأن مصر كان ينقصها أن تصبح مضاف إليها مول آخر) ماركات كافيهات سينيهات خروجات بنات ساحل هاسيندا بو آيلاند.. إلى آخره.. 
 
مصاريف كل ما سبق يجعلك تلهث..
ثانية واحدة, ممكن أسألنا كلنا سؤال ؟ 
هو إحنا فعلا من جوانا بننبسط بكل اللي فات ؟ .. ما تردش دلوقتي خد 10 دقايق فيهم تحس من جوه قلبك، وأنت بتسأل نفسك؟
 حابب الطريق اللي إنت ماشي فيه ده ؟ .. ولا لو سألتك حتقولي ( مش حاسس).. بآكل ومش بحس بمتعة الأكل.. بخر ج ومش بحس بمتعة الخروجة.. بفرح وبضحك ومش لامس من جوه قلبي الضحكة والفرحة !!
***
يقول الرومي ( ما هي الغاية القصوي من الحاجة ؟ ) 
(العثور علي ما ليس له حاجة ) 
***
إتفضل خد ده ؟ .. إعلان عشان تجري ورا ده كمان  ؟ سوشيال إنفيلونسرز بيقولولك ضروري تبقي زي فلان !!
 
إنت عايز إيه ؟ طلبك إيه ؟ شكل شعرك، جسمك، لبسك، أسلوب حياتك؟.. 
***
إنسان له أربع مكونات (روح، عقل، قلب، جسد) .. ما سبق حقيقة علمية وليست إدعاء يقبل الاحتمالات..
أعرج أنت إن وفيت (حاجاتك ) الجسدية .. وأهملت عقلك وقلبك ومن قبلهم روحك.. 
تظن أنك وفيت روحك حقها، إن صليت وصمت وتصدقت وفقط !!.. تظن ذلك وأنت تخرج في كثير من الأوقات من بين صلواتك فارغ القلب والروح، ذلك أن غاية وجودك أن تبحث عن ذاتك وكما يقول النابلسي ( من عرف نفسه فقد عرف الله ).. 
 
 بداخل كل منا نفخة من روح الله, ولأنه الله فقد أودع بداخل كل منا ما يميزه كإنسان بشري من اسرار جماله وجلاله، إن وجده، وجد الله وأصبح هو نفسه ساحرا، خلابا، جاذبا لكل معطيات (السعادة الحقيقية ) من حوله وليست أبدا المزيفة.. باحثا عن رحلة تحوي في باطنها الكثير من الألم والشجن الآخذين بروحك إلي حيث الإرتقاء الصاعد لأعلي حيث معني الحياة وحقيقة الروح بحثا عن المعني حيث ميلاد عصر الحكمة الذذي يطل علي الأرض.. حيث كتب ستؤلف وأحاديث ستجري، وإجتماعات وأناس بحثت سابقا عن حقيقة خلق الجسد الإنساني بأعضائه وأجهزته المختلفة، وتبحث الآن بعد أن ظنت أنها بلغت من علوم المعرفة مبلغها، عن حقيقة الروح والمعني .. 
 
***
للنظم الإقتصادية بالطبع علاقة وثيقة بالعلاقة الروحانية.. فالإقتصاد هو طريقة إدارة الأموال لتغذي الغالبية العظمي من البشر, بالأفكار والمباديء التي منها ستوضع قائمة المشتروات بما سيكون له الأولوية في ميزانية منازلهم.. وكلما كثر الضغط والإلحاح بكل ما هو مادي ( خالي من الروح) علي الأسرة، كلما اصبح أولوية..حتي إعلاميا (بنستسهل )تقديم المعني السهل فهمه..
 
هل تدركون معني إستمرار ذلك .؟.. المجتمع هكذا سيصبح أغلبه من مرتادي العيادات النفسية..
 
ف(وجع الروح ) يؤلم تماما بل قد يفوق ( وجع البدن )
 
***
يقول الرومي: 
 
الغرض الوحيد من اكتساب المعرفة هو العثور علي الطريق إلي الإله الذي هو الحقيقة المطلقة (الحق ).. وينبغي علي كل إنسان السعي للوصول (للتحقيق ) بنفسه.. إنك تتعرف علي ربنا بنفسك.. واللي بدايته إنك تتعرف علي نفسك.. 
 
إقفل موبايلك، شد الفيشة، روح في مكان لوحدك، دور إزاي تتعرف علي نفسك، إبدأ الرحلة وإعمل إنعكاس علي كل موقف بيحصل لك، إبعد المحبطين اليائيسين عن دايرتك، إقعد في وسط ماية وخضرة وصمت.. حب صوت الصمت لحد ما تسمع صوت نفسك الحر.. ما تخافش منه ولا من قلقه، في الأول زي ما تكون بترجع الإرسال للجهاز اللي نايم بقاله سنين طويلة، حتسمع (ششش ) وتشويش وراه وصل.. وراه تشويش.. وراه وصل، لحد ما تلاقي نفسك علي (موجه وصل) حتدفع فيها كل حاجة عشان تلاقيها ولو لثوان.. والغريب إن مش مطلوب منك فيها إلا إنك تعيشها ..بس وإنت قلبك زاهدها.. وعارف كويس إنها مش دايمة واللي دايم هو الوصلة  اللي جايزتها الكبري هي بدايات (طريقك الخاص جدا ) للحكمة..
 

 

لا توجد تعليقات على الخبر
اضف تعليق