شيالة الأمل والأنابيب.. حكاية أم مروة 40 سنة شقيانة على ولادها الـ7

ملامحها روت حكايتها دون أن تنطق بكلمة واحدة، فتجاعيد وجهها المحفورة حكت لنا قصة 40 سنة من الشقى والتعب والجرى على أكل العيش، خطواتها تشبه الطفل الذى يحبو ويتعلم المشى على عجلته الصغيرة ولكن عجلتها كانت أكبر بكثير حيث تحمل أكثر من 6 أنابيب غاز بأوزان لا تقل عن  100 كيلو فى اليوم، ولكن أم مروة  قاومت كل ذلك  لتصرف على أبنائها الـ 7 وعلاجها.

"أقعد أمد أيدى للناس يشحتونى ولا أكل بعرقى وأصرف على علاجى وعيالى"، هى الجملة التى بدأت بها أم مروة التى تبلغ من العمر 68 عاما كلامها لـ اليوم السابع حيث قالت: "من وأنا لسه شابة صغيرة جوزى توفى وسابلى 7 عيال أربيهم لوحدى كانت كل السكك متقفلة فى وشى أهلى طردونى من البيت عشان مقدروش على مصاريف عيالى وحماتى قالتلى روحى حطى العيال فى ملجأ، لكنى مقدرتش أعمل كل ده، كنت بجيب زيت وسكر وابيعه للناس وألف على البيوت عشان آكل عيالى وأقدر أعيش".

واستكملت حديثها: "بعد فترة معرفتش استمر فى الشغلانة دى لقيت واحدة بنت حلال قالتلى تعالى خدى أنابيب من المخزن على عجلة ولفى بيعيهم فى البيوت وبقيت فعلا بعمل كده باخد بالـ7 والـ8 أنابيب واحملهم على عجلة وألف بيهم فى الشارع وأنادى اللى عاوز أنابيب".

وأضافت: "ببيع أنابيب بقالى 40 سنة ورغم أنى صحتى تعبتنى ومركبة قسطرة على القلب لكنى بشتغل لحد دلوقتى وأنا عندى 68 سنة عشان أجيب علاجى واصرف على البيت، زمان كنت بشيل بالأنبوبتين والتلاتة لكن دلوقتى مبقتش أقدر بقيت بس بجر العربية وامشى بيها واحطها عن البيوت واللى عاوز بخلى واحدة تطلعله الأنبوبة واديلها 10 جنيه، والحمد لله جبت مثلاً  5 أنابيب وخدت فيهم 50 جنيهًا حلو رضا أحسن ما أمد أيدى وحد يكسر عينى".

"بلاقى الحنية فى الناس الغريبة اللى ماشية فى الطريق مش بلاقيها من عيالى"، هى الجملة التى عبرت عن حال أم مروة حيث قالت: "عيالى كلهم ظروفهم وحشة ومحدش فيهم شغال انا اللى بشتغل رغم انهم متجوزين ومخلفين مفيش غير البنات بس اللى بتشتغل، أنا بدعيلهم بالهدايا ربنا يهديهم ويلصحلهم الحال.

وتابعت: "أنا راضية الحمد لله كفاية دعوات الناس ليا فى الشارع اللى يقولى ربنا يقويكى يا أمى واللى يقولى ربنا يديكى الصحة وبيبقوا عاوزين يشيلوا عنى والله ما فى عيل من عيالى بيعمل كد ولا حتى بيدينى حاجة".

وأنهت حديثها قائلة: "كل اللى بتمناه من الدنيا انى أطلع عمره وأزور النبى عليه الصلاة والسلام وإن ابنى يشتغل ولا حتى يكون عنده توكتوك يصرف منه".