إيناس عزالدين تكشف عن مرضها

كشفت الفنانة إيناس عز الدين، نجمة برنامج «آراب أيدول»، عن حقيقة مرضها لجمهورها ومتابعيها، خاصة بعد الشائعات التى تداولت عنها مؤخرًا، بسبب الوعكة التي تعرضت لها، فكتبت عبر صفحتها على موقع التواصل الاجتماعي «فيس بوك» قائلة: «أنا عارفة إن ناس كتير قلقانة عليا وبعتولي رسايل وكلموني علشان يطمئنوا عليا.. بعتذرلكم كلكم على عدم ردي وبجد بشكركم من كل قلبي على خوفكم واهتمامكم ودعواتكم الغالية اللي بتمنالكم مثلها يارب وأكتر بكتير».

ثم أوضحت لهم عن حالتها: «أنا عندي قرحة مزمنة في القولون وهعيش بيها عمري كله، ولو ما قدرتش اتحكم في انفعلاتي هضطر أجلًا أم عاجلًا أشيل القولون، ووصلت لمرحلة نزيف القولون وده أضعف جسمي تمامًا، وخلاني فقدت 10 كيلو من وزني في أقل من أسبوع، وكله من سوائل الجسم وده عملي جفاف تام، ودخلت في مرحلة شديدة من هشاشة العظام وتلف أعصاب بسبب عدم دخول الأكل والمية جسمي، وده كان مخليني مش بقدر أحرك أطرافي ولا بقدر أقف على رجلي لأن كان القولون رافض تمامًا الأكل والشرب وحتى المحاليل ما كانتش كفاية إني أعيش، بالإضافة لتشخيص حالتي غلط أكتر من مرة وده دهور حالتي أكتر».

ثم أكملت: «لحد ما روحت لدكتور هو اللي ساعدني على إني ألاقي العلاج المناسب لحالتي، وإمبارح كان أول يوم أقف على رجلي بعد ما أخدت حقن أعصاب وفيتامينات والحمد لله النهاردة بدأت في التحسن ببركة رب العالمين، وببركة دعاكم أنتم يا أغلى الناس على قلبي، وأول حاجة فكرت فيها حتى وأنا لسة تعبانة هي إني أطمنكم عليا، عسى ربي يخليكم ليا يا أغلى أهل وإخوات».