أولتراس أهلاوي يعلن عن حضور مباراة الأهلى أمام الطلائع

أعلنت مجموعة ألتراس أهلاوي عن حضورها مباراة فريقها أمام طلائع الجيش المقرر لها غدًا الخميس، على ملعب بتروسبورت، بختام مباريات الجولة الأولي لدوري 2015/2016، رغم قرار الجبلاية بإقامة اللقاء بدون جمهور.
قام ألتراس أهلاوي بإصدرا بيان عبر الصفحة الرسمية لها علي موقع التواصل الإجتماعي "فيس بوك": تؤكد فيه معاد التجمع لحضور المباراة.
وجاء بيان الألتراس كالتالي:
عجبكم شكل الجمهور فى السوبر ؟؟ حسيتوا الجمهور مهم يبقى فى المباريات.. فهمتوا معنى الكرة للجماهير ؟؟ اللى شفتوه هيفرق معاكوا فى حاجة ؟؟ هيخليكم تفكروا فى حلول ؟؟
كلها تساؤلات غالبا محدش هيجاوب عليها .. وللعلم الجمهور المصرى هو الجمهور المصرى فى اي مكان لما بيحس بالمسئولية بيكون قدها.
جمهور الكورة عايز يرجع الاستاد .. عايز يبقى فى مكانه الطبيعى .. واضحه ومش محتاج لا تفسير ولا شرح.
جمهور الاهلى تواجد فى مباراة اورلاندو فى البطولة الكونفدرالية .. ورغم هزيمة الاهلى لكن المباراة عدت بسلام .. ونفس الجمهور تواجد فى تدريبات الفريق مرات ومرات ومرات وبالالاف وبردو مفيش مشاكل حصلت.
الجمهور طرح افكار كتير .. اما شركات خاصة للتأمين .. او ان الجمهور يأمن نفسه بمساعدة أمن النادى الاهلى .. واستعداد الجمهور للتفتيش .. لكن لا حياة لمن تنادى !!
الحديث عن صعوبة حضور الجمهور بسبب الانتخابات شىء غريب .. واذا كان المسئولين مشغولين بالانتخابات .. مفيش اى مشكلة يسيبوا الكورة للجمهور وهو على اتم الاستعداد للحضور وتنظيم نفسه بنفسه بمشاركة من أمن النادى الاهلى.
بداية الدورى الجديد بدون جمهور هو استمرار لقتل كرة القدم فى مصر .. وعليه تقرر تجمع جمهور الاهلى وجميع سكاشن أولتراس أهلاوى فى القاهرة والمحافظات يوم الخميس القادم لحضور اولى مباريات الفريق فى الدورى العام امام طلائع الجيش .. التجمع الساعة الخامسة مساءاً امام بانوراما 6 اكتوبر – صلاح سالم .. للتجمع والتحرك الى استاد بترو سبورت.
الكرة للجماهير