غلوشيات رمضانية #17 رمضان.. يكتبها عبدالله غلوش: مأمون وشركاه.. لو رئيس جهاز أمن الدولة بنفس سذاجة كمال أبوريه يبقي عليه العوض بالبلد دي.. سقوط حر..أول ضحكة مسموعة لنيللي كريم في دراما رمضان من 3 سنين

# 17 رمضان

-خايف وسط هوجة برامج القافية المنتشرة في رمضان السنة دي زي "الحلو الخفيف مع شريف" و "للأمام مع طارق علام"، قناة دريم تفاجئنا ببرنامج “يا خراشي مع وائل الابراشي".
-بمنتهي الامانة هل إعلانات قطونيل او دايس او الأمبراطور طول السنين اللي فاتت، أقنعت حد فيكم انه يغير نوع البوكسر بتاعه؟
-في نفس اليوم اللي محمد رمضان اتجوز عليها روجينا في "الأسطورة" مي عمر اتخطبت لوليد فواز في "الطبال".
-أفراح القبة.. محمد ياسين معتمد علي سياسة حلقة حلوة و ٣ ممله.
-أفراح القبة .. دينا الشربيني وهي بتقلد سوسن بدر الحاجة الوحيدة اللي ممكن تشوفها في حلقة النهاردة.
-كوبا أمريكا .. إهدي يا ميسي .. مش كده يا ميسي.
-شيرين رضا هربت من السجن في "فوق مستوي الشبهات" علي طريقة فيلم "أبوعلي" ، وغادة عبدالرازق هربت من "الخانكة" علي طريقة فيلم "اللي بالي بالك".
-لسه هابتدي افوق من صدمة رسالة orange بعتاها للعملاء بتوعها بتقول (عايز تعرف تفسير رؤية الحمار في الحلم،اشترك الان) ، لقيتها بعتالي رسالة تانية بتقول (ابعت اسم الفنان اللي محمد رمضان لبسه قميص النوم واكسب ١٠ الاف جنية).
-الخانكة.. مش عارف ايه المغذي من ظهور مشهدين تلاته للقمر في كل حلقة.
-مصطفي ابوسريع مفيش اتنين يختلفوا علي أن دمه خفيف ، زي ما برضه مفيش اتنين يختلفوا علي ان حركاته وافيهاته في “راس الغول” نسخة طبق الأصل من حركاته وافيهاته في “الطبال”.
-سقوط حر.. اسم علي مسمي.
-سقوط حر.. أول ضحكة مسموعة لـ نيللي كريم في دراما رمضان من 3 سنين.
-سقوط حر.. لو المخرج شوقي الماجري كان أختار الدكتور أحمد عكاشة أو الدكتور هاشم بحري مكان محمد فراج ، كانوا عملوا الدور بطريقة أحسن و أسهل وأبسط من كده.
-شهادة ميلاد.. طارق لطفي وكل اللي في المسلسل هايلين وموهوبين وعلي عيني وراسي ، بس مش معني اني صاحب المخرج او المؤلف او حد من الممثلين اكتب كل يوم انه من المسلسلات الناجحة ، لان الحقيقة المسلسل ضلمة وبطئ وكئيب وتقريباً نسبة مشاهدته صفر، واتحدي اي حد يلاقي ١٠ من اصحابه بيتفرج عليه اصلا .
-رأس الغول.. مظهر أبوالنجا من الحاجات الحلوة القليلة في المسلسل.
-الأسطورة.. الحالة الوحيدة اللي محمد رمضان ممكن يحس فيها ان مسلسله نجح فعلا ، لما الحكومة تبطل تشتري سلاح من فرنسا وروسيا.
-الأسطورة.. مي عمر بطلة العالم في الأفورة.
-الأسطورة.. أجر فردوس عبدالحميد في المسلسل كله تقريبا، ممكن ميوصلش للعشرين ألف دولار اللي ناصر وافق يدفعهم لهند رضا كل شهر.
-اتصالات.. فكرة اعلان النني احلي من صلاح ، وسكربت اعلان صلاح افضل من النني.
-القيصر.. مش معني ان حضرتك عايز تهرب من المط او مزنوق في معاد التصوير ، تخلي الحلقات مدتها تلت ساعة.
-القيصر.. الـ suspense الزايد عن الحد بيتقلب للضد، والناس عينها مش ناقصة زغللة أساسا.
-القيصر.. يوسف الشريف احسن ممثل في مصر يعمل اول 10 من مسلسلاته هايله ومايعرفش يقفلها بعد كده.
-أحمد السعدني خطب ملك قورة في “وعد” واتقبض عليه في قضية افيون بـ ” أفراح القبة”.
-مأمون وشركاه.. لو رئيس جهاز أمن الدولة بنفس سذاجة كمال أبوريه، يبقي عليه العوض في البلد دي.
-أبو البنات.. في تاريخه الفني كله، مصطفي شعبان خد فياجرا مرتين .. مرة مع لقاء الخميسي في “الزوجة الرابعة” والمرة التانية امبارح مع صافينار.
-ماينفعش تحبب نفسك في حد وإنت بتحب حد تاني .. أمينة خليل “جراند أوتيل”.
-الشخص المهم في حياتك هو اللي تحس بغيابه مش اللي تحس بوجوده.. عمرو سعد .. “يونس ولد فضة”.
-الراجل اللي ميبقاش عنده مطرح ينام معاكي فيه، اعرفي علي طول أنه هايقلبك في الاجره .. سوسن بدر “أفراح القبة”.
-ربنا يرحمك يا أمي ويرحم أمهاتنا جميعا ويخلي أمهاتكم يارب.