رامي رضوان: دراما رمضان 90% بلطجة ومخدرات ودعارة

شارك الإعلامي رامى رضوان، جمهوره، رأيه في دراما رمضان هذا العام، حيث نشر عبر حسابه الشخصي على موقع التواصل الاجتماعى فيسبوك، رأيه قائلًا: «وانت بتاخد جولة في مسلسلات رمضان للأسف هتلاقي السمات الغالبة على ٩٠٪ منهم: جريمة مخدرات، دعارة، انحلال، ألفاظ بذيئة، خمر، خيانة، بلطجة، صحيح ده واقع موجود.. بس موجود بنفس النسب ويمكن أكتر في دول كتير عربية وغربية (مع اختلاف الأسلوب والأنواع)، ومع ذلك لا تجد هذه السمات المقززة هي الغالبة على مسلسلاتهم وأفلامهم».

وأضاف: «طب سيبك من المقارنة.. ياسيدي وريني السمات دي وخدني في رحلة من خلال العمل تعالج أو تبرز حل أو تؤكد أن ده حال مايل ويجب الخلاص منه..الخ. هو عيب أن السينما ولا الدراما ترتقي بالمشاهد وبالمجتمع؟، طب سيبك من المعالجة والمشاكل والهم والغم.. معقول مافيش عندنا قصص نجاح مثلًا تفتح نفس الواحد على الشغل؟، راجل شق طريقة بشرف ومثابرة وإخلاص؟، أسرة طبيعية محترمة مافيهاش انحلال وبيكلموا بعض عادي منغير شتيمة وطول لسان؟، حارة لسه فيها جدعنة ورجولة ومودة ورحمة وخير وناس بتخاف على بعضها وبتساعد بعضها.. مابينهشوش في بعض ولا بيقتلوا بعض؟، شاب أو شابة رياضيين حققوا انجاز عالمي بعد طول إعداد وتمرين وجهد كبير؟، علاقة طيبة ظريفة كوميدية او رومانسية بين رجل وإمرأة؟، رجل شرطة مخلص وعارف ربنا وبيشتغل بما يرضي الله؟، قصة واحدة من مئات القصص البطولية مثلًا لرجال الأمن من أي مؤسسة؟، تفتكروا الناس مالهاش نفس تشوف زوايا حلوة لمصر وناسها أكتر من كم الغم الداير في معظم أعمال السنة دي واللي قبلها واللي قبلها؟!».