بالصور.. إضراب مدرسات الفنية بنات ببنها ومدير التعليم الفني يثير غضبهم

أضرب العشرات من مدرسات مدرسة الفنية بنات ببنها، عن العمل، بسبب قرار ندبهم بالتناوب مع مدارس أخرى بالمحافظة، وتم اختيار 33 مدرسة أساسية، تم تعينهن سنة 1984، تتراوح أعمارهن من 57 إلى 55، ولا يقدرن على السفر.

وقالت «منى» إحدى المدرسات: «إحنا مش صغيرين علشان نتبهدل، ليه القرار ده وليه أطبق على الفنية بنات فقط، مطبقشي على أي مدرسة تانية، إحنا فينا مدرسات فاضل لهم ثلاث سنوات ويخرجوا معاش، وسكنهم قريب من المدرسة وطول حياتهم على كده، ازاي تقدر تروح الخانكة وشبين القناطر».

وتابعت آمال ميخائيل: «أنا عندي مرض في رجلي ومش بقدر أمشي كتير، وجوزي مريض علشان أروح الخانكة أمشي إزاي وأرجع بيتي امتي علشان أراعي جوزي».

وقالت الحاجة قدرية: «أنا عندي 54 سنة، وبعاني من مرض فيروس «سي»، مقدرشي أقعد في المواصلات وقت طويل، رجلي تعباني وجالي انتداب للقناطر، يعني ساعة في العربية، إزاي وده كله علشان يجيبوا اللي كنا بندرس لهم مكانا هما عندهم 30 سنة مفيش مشكلة عندهم احنا منقدرشي».

ومن جانبه استنكر طه عجلان وكيل وزارة التربية والتعليم بالقليوبية، القرار، وطلب من المدرسات تقديم شكوى، وبالفعل تقدمن بشكوى واستلمها محمد السيد الصادق مدير التعليم الفني بالمديرية، إلا أنه أثار غضبهم بسبب معاملته السيئة لهم واستهتاره بهم.

وقال «صادق»: «مفيش واحدة تسألني هعمل إيه أنا معنديش رد، واللي أعمله هعمله ملكوش دعوة، ويلا كل واحدة فيكم تمشي من هنا حالًا».