«أكل العيش مر».. «سناء غريب» أول سائقة «ميكروباص» في قنا

«أكل العيش مر والحوجة مرة أوي، وفي رقبتي 5 عيال هصرف عليهم منين بعد ما جوزي مات، وقفت واشتغلت وبقيت زي الرجالة عشان أعيش ولادي عيشة مستطورة»، هذا ما قالته الحاجة «سناء غريب» سائقة الميكروباص لصوت الأمة.  

وقالت الحاجة سناء: «جوزي مات من 10 سنين مرو واحدة لا قيت حمل تقيل علي كتافي، ولازم أبقي قده، جوزت بنتي وربيت عيالي ال5،  فيهم 3 متخرجين و2 لسة بيتعلموا، أي حد يحط نفسه في مكاني، هيتصرف إزاي،  لقمة العيش مش بالسهل والله، بقيت بسوق علي  عربيات (البيجو) وكل ما بيجلي طلبات شغل عليها بعملها».

وأضافت سناء، أنها  اتجهت إلى قيادة الميكرباص، الذي واجهت الكثير من الانتقادات بسببه، من قبل الأقارب والجيران والمعارف حتي أبنائها، حتي زملائها السائقين رفضوا تواجدها في وسطهم «أصحاب الكار»، واقتسام  الرزق بينهم.

وقال محمد ابن الحاجة  سناء: «بتشرف بيها قدام أي حد، وبساعدها في الإجازة، دي هي أمي حبيبتي وأحسن واحدة في الدنيا والحمد لله».

«هي مبتعملش حاجة لا عيب ولا غلط، أنا بحبها أوي وبتشرفها بيها جدا».. هكذا أكدت هبة ابنه الحاجة سناء، مضيفة: «بيبقى نفسنا نساعدها وننزل معاها على الميكروباص، بس هي مبترضاش تبهدلنا، وأمنية حياتي أريحها، وأستتها وأكرمها».

بقبلة علي وجها الذي تظهر عليه ملامح الشقاء والعناء، قامت «توحة» حفيدة الحاجة «سناء» بالتعبير لها عن حبها وتقديرها والفخر الذي تشعر به نحوها.

وأكد زملاء الحاجة سناء، من السائقين على احتوائهم لها، ومساعدتها في تحميل عربيتها،  كما أنهم يقدرون عملها الشريف والعفيف والسعي وراء الرزق ولقمة العيش، قائلين: «دي ست بطلة».