الكبير هرب

بائع الصحف بينادي الصبح بأعلى صوته على الجرايد وهو بيلف في الشوارع اقرا يا باشا اقرى يا هانم أخبار أهرام جمهورية.. الكبير هرب.. الباشا هرب.. حبيب العادلي هرب إزاي ده.. إيه حبيب العادلي هرب.

تابعت الجريدة باهتمام أيقنت أن الخبر حقيقة بعد ما صدر بيان من وزارة الداخلية، قالت فيه إن حبيب العادلي وزير الداخلية السابق، هرب ومش موجود في بيته.

ركبت المترو وأنا مازلت أتابع وكمان النيابة استلمت إخطارا رسميًا من وزارةالداخلية.. إن الباشا حبيب العادلي مش موجود في بيته.

وقال إيه يا سيدي النيابة كمان كلفت أجهزة وزارة الداخلية، بسرعة القبض عليه، وإيداعه السجن لتنفيذ حكم قضائي ضده بسجنه 7 سنوات في قضية الاستيلاء على أموال وزارة الداخلية.

واحد قاعد جنبي في المترو بص على الخبر وهات يا ضحك لحد مكان هيقع على الأرض بصيتله كده باستغراب ودار بينا الحوار التالي:

- بتضحك على ايه

- إيه الكلام اللي ملوش لازمة ده هيه الجرايد دية بتكتب أي حاجة وخلاص بيمولوا ورق ويضحكوا على الناس..

لم أفهم كلام الرجل وظننت أنه غير طبيعي.. ولأنه توقف عن الضحك وقالي: العالم ديى تعبانة في مخها يا حضرة.. هو مين ده اللي يهرب؟

- الباشا الكبير

-  هو أنت تعرفه يا حاج

- هو مين فينا ميعرفوش

- قصدي معرفه شخصية يعني

-  لا والله محصليش الشرف

- بس تقدر تقولي حضرتك بما إنك باين عليك إنك متعلم هو لو حبيب باشا عايز يهرب هيهرب في السر.

- لا طبعا محدش يقدر يكلمه

- انهي حد في أي حته في مطار أو محطة مترو أو أتوبيس ممكن يوقف الكبير أو يقوله بطاقتك انتوا مجانين؟

- تفتكر حضرتك لو أنت مكان أي ضابط أو لواء وقبلت سعادة الباشا الكبير «حبيب» ممكن تعمل إيه؟ غير إنك تديله تعظيم سلام أو تتصور صورة سيلفي جنبه.

مش تقوله بطاقتك والكلام ده انتوا مجانين باين عليكوا؟ ده وش الباشا بطاقة يا حضرة مش الباشا اللي يتعمل معاه كده.

وضحك بصوت عالي مرة أخرى جعلت كل من في المترو ينظر إلينا

- وبعديين يا حضرت هو مين بقى اللي راح فتش بيته أو دخل يقبض عليه وعرف إنه هرب معاون مباحث المنطقة يعني وداخل يقبض على عيل محكوم عليه في قضية غرامة في المترو.

ولا مين بالظبط اللي النيابة كلفته يقبض على الباشا الكبير ويقدر يهوب برجليه هناك ناحية بيته ويفتشه ويشوف الباشا هناك ولا لا يا عم قولوا كلام يعقل بأه وارحمونا.

وتركنا الرجل واستاذن لأنه نازل المحطة دية ونظرت الي الخبر في الجريدة مرة تانية وأنا أفكر في كلام الرجل وفجأة ضحكت بصوت عالي جدا حتى كدت ان أقع على الأرض والناس تنظر لي وأنا اكرر مقولة الرجل إنتوا مجانين ده الباشا الكبيررررررررررررررر.