خبط بالعقل.. «لولولي» اقتصاد قطر في النازل والدولار شرحه.. إيه العلاقة «ضبط خالية إخوانية تحرضية بعد زيادة أسعار البنزين».. «محدودي الدخل ملوش فيها» الإسكان شقق مميزة..«هتموتي يا سوسو» ضريبة جديدة على الدخل

الإثنين، 03 يوليو 2017 08:50 م
خبط بالعقل.. «لولولي» اقتصاد قطر في النازل والدولار شرحه.. إيه العلاقة «ضبط خالية إخوانية تحرضية بعد زيادة أسعار البنزين».. «محدودي الدخل ملوش فيها» الإسكان شقق مميزة..«هتموتي يا سوسو» ضريبة جديدة على الدخل
خبط بالعقل
فاطمة ياسر

تراجع سعر الدولار 14 قرشا

نزل نزل نزل ..أخيرا وبعد طول انتظار.. هو ايه اللي نزل؟.. سعر الدولار.. ياراجل.. أه والنعمة..اوعي تكون حاجة زي انهار الدولار ونلاقي الجنية اتعوم اكتر ما هو عايم ههههههه..لا يا عم الدولار نزل مبلغ محترم  14 قرش مرة واحدة..انت بتهرج بقي ولا ايه؟ ايه يعني 14 قرش؟.. وبعدين  هو نزوله ده هيفدنا بايه ولا دة تعويم علي زيادة أسعار البنزين وكده.. وانا اشعرفني المهم أن الـ 14 قرش دول منزلهمش الدولار من 3 شهور وأخيرا نزلهم والحمد لله..وبعدين ما البنك المركزى هو اللي قال مش انا..قال إيه بقي؟.. تراجع الدولار 14قرشا ويصل لـ17.99جنيه للمرة الأولى منذ 3أشهر..طب الحمد لله هي دية النهضة ولا بلاش..


اعرف يعني ايه ضريبة الدخل

تعرف ايه عن ضريبة الدخل؟..والله يا باشا معرف عنها حاجة.. طب تعالا انا هقولك أصل البلد  محتاجة فلوس وبناء علي كدة  عملت ضريبة علي  مرتبك أو دخلك يعني  وطبعا باستثناء محدودي الدخل عشان زي ما احنا عارفيين ان الحكومة بتخاف وبتحمي فلوس المواطن..بص بقي وبحلق عينك عشان تعرف وتفهم اللي ليك واللي عليك يا معلم.. هتدفع 456 جنيها  لو دخلك السنوى 37 ألف جنيه.. و3630 لمرتب سنوى 52 ألفا.. و34 ألفا جنيه لمرتب 207 آلاف.. و85 ألف لراتب 307 آلاف جنيه فى السنة.. يارب تكون فهمت..لو دة حصل ابقي فهمني ههههههههه..


الشرطة فى خدمة الشعب الحران

الارض لو عطشانة نرويها..وبرضوا سجناء مصر لو حرارنين نهوي عليهم..مش كدة ولاايه؟..الداخلية عشان بتحس بالمواطنين اللي برة واللي جوة السجون رفعت شعار "الشرطة فى خدمة الشعب الحران"..يعني ايه بقي؟..يعني كترت من فتحات التهوية داخل العنابر والسجون عشان السجناء ميمتوش من الحر..ونعمة قلبهم حنين..عاشت الداخلية المصرية..


اقتصاد قطر في نازل اعرف ازاي

 اقتصاد قطر فى النازل..ياراجل؟ اه والله دة اللي بياكدوا خبراء اقتصاد كبار..طب عرفوا منين؟..هقولك حصل ارتفاع في معدلات التضخم بشكل كبير..وتراجع الريال القطرى أمام الدولار بمعدل ثلاث نقاط للمرة الأولى منذ 12 عاما..و تراجع حاد فى السيولة النقدية ومعاناة كبيرة للعملة منذ المقاطعة..وسعر صرف الريال أمام الدولار الأمريكى 3:66..وكمان دعما لاقتصاد تميم القطرى أجبرت إسرائيل بنوكها على شراء الريال القطرى..فهمت حاجة؟..لا ..ولا انا والله..


بعد زيادة أسعار البنزين الداخلية ضبطت خلية اخوانية خططت لإثارة المواطنين ضد زيادة الأسعار

الاخوان حشرين نفسهم في كل حاجة وبيستنوا اي فرصة  واي ثغرة تحصل ويعملوا زيطة وزمبليطة بس المشكلة بقي انهم المرة دية  الداخلية كشفت الاعبهم عشان الشرطة طبعا شيفة شغلها فاللي حصل كالاتي.. ان الداخلية  ضبطت خلية إخوانية من 7 أفراد خططت لإثارة المواطنين بعد تحريك الوقود أو يعني زيادة أسعار البنزين وكدة..شمتانين فينا اكيد مش كدة ولا ايه..

الاسكان تستحدث محورًا جديدًا للسكن تحت مسمى سكن مصر بمساحات ١٠٠ متر

تطور كبير في أسعار الشقق اصل اقل شقة دلوقتي بقت بربع مليون جنية وميقدرش طبعا يجبها اي شاب بياخد 1200 جنية في الشهر..فوزارة الإسكان والدولة وكدة بيساعدوا الشباب وعملولنا في الأول شقق 63 متر والدنيا مشيت شوية وبقت 90 متر..بس بعد ما كان الشاب بيدفع 4000 جنية مقدم حجز في البنك بقت  والحمد لله وصلت ل9 الاف مع ان المرتب مزدش..وعشان كدة وزارة الإسكان قالت تجدد من نفسها وتستحدث محورًا جديدًا للسكن تحت مسمى سكن مصر بمساحات ١٠٠ متر للوحدة ويطلق عليه اسكان مميز..هو يعني ايه اسكان مميز؟..ومين اللي هيقدر يدفع الاقساط وكدة؟..الشاب ابو  مرتب 1200 جنية ولا اللي بياخد  6 و7 فيما فوق..اعتقد ان حتي وزارة الاسكان وشققها ميقدرش علي اسعرها غير الشديد الاقوي..

 

بعد قرصه قنديل البحر هتعمل ايه؟؟

نصيحة علي الماشي..بعد زيادة أسعار البنزين والناس اللي في الساحل والإسكندرية مش عرفين يجوا ههههههههه..ولا حتي ينزلوا البحر بسبب القناديل اللي اكتسحت الشواطئ وغياب طبعا الرقابة وكدة..لو اتعرضت لقرصة قنديل البحر هتعمل ايه؟..هتغسل المكان المصاب فورا بماء البحر..هتدهن المكان المصاب بالخل أو الزبادى لمعادلة التأثير القلوى للمادة التى يفرزها القنديل..كريم مضاد للالتهاب للمكان المصاب مرتين يوميا..هتاخد قرص مسكن فى حالة الإحساس بحرقان شديد بمكان الالتهاب..وضع كمدات مياه باردة واستشارة الطبيب على الفور فى حالة الإصابة بضيق فى التنفس أو الرعشة..الكورتيزون فى حالة إصابة الجسم بمضاعفات من لسعات القنديل على الجلد أو التنفس..استخدام المحاليل المعقمة والقابضة التى تسمى برمنجانات البوتاسيوم، وهو محلول مطهر وقابض لتجفيف الفقاعات من سطح الجلد..الانتقال لأقرب مستشفى بعد وضع الإسعافات الأولية من مياه البحر والخل والزبادى، لمتابعة الحالة وعدم الوصول إلى مضاعفات.

 

 

 

 

لا توجد تعليقات على الخبر
اضف تعليق


الأكثر قراءة