خبط بالعقل..المصريين عاوزين رقبة تميم.. التعليم هتخفف «المحشي» في المناهج.. الكل أمام زيادة الكهرباء سواء.. وصول تامر حسني للعالمية «عقبالنا»

استشهاد ضابطين ومجند في هجوم إرهابي بالعياط

البكاء والحزن يخيم علي الشعب المصري بمعدل كل أسبوع..عارف لما تنام لا بيك ولا عليك وتصحي الصبح علي صوت ضرب نار وتشوف بيعينك دم ناس ملهاش دعوة باي حاجة..لا سياسية ولا جماعة وحتي ارهاب..دة اللي الشعب المصري بقي بيشوفوا كل يوم.. انهاردة الصبح صحينا علي  استشهاد ضابطين ومجند في هجوم إرهابي بالعياط..وعارفين دة  عمل ايه للشعب المصري..أنا هقولكم..عوزيين يحكاموا  أمير الإرهاب تميم بن حمد رافضين أى دعوات تدعو للتصالح فى دماء شهدائهم.. شوفتي يا قطر وصلتي بينا لإية؟..

وزارة التعليم هتعدل المناهج

وزي ما اتعودنا وزارة التربية والتعليم بطلع بينات وقرارات  في منها الكويس وفي اللي ملوش ".....".ندخل في الموضوع ارجع معايا كدة بذاكرتك حبة حلويين.. وافتكر لما كنت في ابتدائي واعدادي وثانوي وبتاخد كمية دش غريب الشكل واللون وفي الاخر بردو مبنفهمش أي حاجة..صح ولا انا غلطانة؟..اكيد صح.. بس وزارة التعليم حبت تصلح غلطتها اللي مستمرة من قرون الزمن وقالت انها  هتعدل المناهج بنسبة 70% والاستغناء عن المعلومات الغير هامة..يعني من انهاردة مفيش دش ولا حاجات ملهاش لزمة..بس ونبي أوعوا تلغوا تاريخنا وثورتنا العظيمة..فهمين..

الكهرباء.. لن نستثنى أحدا من زيادة الأسعار

 هتموتي يا سوسو..بس للاسف مش سوسو لوحدها دية فوفو وكوكو واوس اوس.. وكل الاسماء اللي تعرفها واللي متعرفهاش..اصل الكهرباء بتقول إنها  لن نستثنى أحدا من زيادة الأسعار.. والدعم المقدم لمحدودى الدخل زاد..يعني كلنا طالع عينا مع بعض بس دي مش عينا بس دية عنا وقلبنا وفلوسنا هههههههههه..علي فكرة مفيش مشكلة ان الكهربا تزيد ولا حتي البنزين بس ملحوظة ان دخلنا زي ما هو والله وكل حاجة بتزيد بلا رحمة..أرحموا من في الأرض يرحمكم من في السماء..

تامر حسني يضع اسمه بجوار أساطير الفن

حبيبي وانت بعيد مشتاق للمست ايد من غير ولا همسة..كل مرة بشوفك فيها ببقي نفسي "أه"..ارجعلك ياعني حرقة دم واسمعلك كل كلامك هم.. اه انا سي السيد وكلامي هو اللي هيمشي.. اكيد فهمتوا انا بتكلم عن مين..محير العذارا ومحير قلوبهم..بتحبه كل البنات والستات بسبب شعر صدره طبعا..بس هو عمل حاجة جميلة بجد عارفين ايه هي؟..فى خطوة عالمية جديدة وسابقة هى الأولى عربيا.. تامر حسنى يطرق أبواب هوليوود ويعرض فيلمه "تصبح على خير" على المسرح الصينى.. النجم المصرى يترك بصمته على الطباعة الأسمنتية.. ويضع اسمه بجوار أساطير الفن..ربنا معاك يا تيمو..

48% من الرجال مدخنين و15 % من الأطفال

نصيحة علي الماشي..لو انت بدخن والمدام كمان.. اعرف ان نسبة تدخين أولادك كبيرة أصلهم بتبعوا قدوتهم في الحياة..مش كدة ولا ايه؟..بي عشان تبقي فاهم ان في 48% من الرجال مدخنين و15 % من الأطفال..دية نسبة طبعا كبيرة وصادمة..بس اللي أقرته جميعه القلب..طب الحل ايه؟..فكك من السجاير والشيشة وخاليك زي بتوع زمان طبيعي من غير الهم ده..هتوفر صحتك وصحة أولادك وفلوسك كمان..أقعدوا بالعافية..