خبط بالعقل..«لولولي» لا زيادة فى أسعار تذاكر المترو.. «يادي الوقعة المنيلة» نتيجة الثانوية العامة .. «شكلها هتخلص» مقتل زعيم داعش واختيار خليفته.. «اللي معهوش ميلزمهوش» شعار الصعايدة في الجواز

الثلاثاء، 11 يوليه 2017 08:18 م
خبط بالعقل..«لولولي» لا زيادة فى أسعار تذاكر المترو.. «يادي الوقعة المنيلة» نتيجة الثانوية العامة .. «شكلها هتخلص» مقتل زعيم داعش واختيار خليفته.. «اللي معهوش ميلزمهوش» شعار الصعايدة في الجواز
خبط بالعقل
فاطمة ياسر

لا زيادة فى أسعار تذاكر مترو الأنفاق بالوقت الحالى


بالعقل كدة هنطور ولا هنزود؟..سؤال لازم نعرف إيجابته أصل كل حاجة قاعدة تزيد باسلوب صعب..وكان في كلام إن تذكرة المترو هتزيد «قال يعني ناقصينها هي كمان».. أه يا عم أصل الوقود زاد بقي وكدة فالازم تزيد أسعارتذكرة المترو..مش كدة ولا إيه؟؟..بس الحمد لله لاقينا حد يحس بالشعب ودة فضل من ربنا طبعا..ولاقينا وزارة النقل بتقول أن مفيش زيادة في تذاكر المترو..طب الحمد لله..لا اتقل يا معلم دول قالوا في الوقت الحالي.. وربنا قالوا كدة..أه ياني يا امة ياني هنروح الشغل بايه دلوقتي؟..احنا مرتبتنا مبقتش بتكفينا..لنا الله..


نتيجة الثانوية العامة

بعبع البيوت كلها..والسلاح الأم المصرية اللي بيتفع في وش عيالها عشان مستقبلهم..عرفتوا بتكلم عن ايه؟..أكيد "الثانوية العامة".طبعا كلنا عارفيين ان النتيجة المفروض بليل انهاردة.. بس هي دلوقتي على مكتب وزير التعليم لاعتمادها اليوم.. نسبة النجاح تقترب من الـ73% ولم يحصل طالب على الدرجات النهائية.. والأول على الجمهورية بمجموع 409,5 درجة.. يعني الأول علي الجمهوير مجبش 100 في 100..والله انا علي أيامي كان في كذا واحد جايبين 102 في 100..يعني معدي الدرجات النهائية والكلام دة كله تخيل..طب دة معناه ايه بقي ان التعليم مستواه في الطالع ولا العكس..هو انا بردو علي ايامي كانا بنتخرج من الجامعيات واحنا مش فهمين أيوتها حاجة..أه والله.. وبنشتغل شغلانات ملهاش علاقة بدراستنا اصلا..يلا الحمد الله..


مقتل زعيم داعش واختيار خليفته

راح يا اخواتي راح..مين دة اللي راح؟..أقصد مات يا اخواتي مات..مين برضوا؟.. البغدادى مات.. مين ده؟..دة حد مهم اوي دة زعين التنظيم الارهابي داعش..بجد؟..أه والنعمة..طب يعني دة معناه ايه؟..هنتخلص من الارهاب وهنعيش في سلام ولا ايه طمني الله لا يسيقك يا أخي..لا خالص دول طالعوا بيان وبياكدوا أن في اختيار خليفة جديد لـ"داعش"..يعني مفيش أمل؟..لا أمل ولا حتي مصطفي والله..بس في توقعات بتقول أنه هيحصل صراع داموى على المناصب بين المتطرفين..يلا يا رب يموتوا كلهم ونخلص بقي..قولوا أمين...

 

قطر داعمة للإرهاب

كان يا ماكان  كان في بلد بيطلق عليها معزتين وخيمة.. عرفتوها ولا لسة؟؟..المهم بقي ان البلد دية ملهاش لا حضارة ولا حتي تاريخ غير تاريخ أسود ومنيل.. إللي هو دعم الإرهاب وامداده بالفلوس عشان بس يدمر البلدان اللي حواليه.. المهم بقي ربك مبيسيبش والله يا اخونا.. اعتراف فاضح من رئيس تحرير عربى 21 بتلقي تمويل من قطر لدعم الإرهاب.. الموقع المشبوه يسوق لداعش والإخوان بتعليمات من الدوحة.. مدونون: خبتم وخاب مسعاكم.. وخبراء: هدفهم اختطاف مصر..بس خلاص..


اللي معهوش ميلزمهوش.. الصعيد الأكثر فقرا الأعلى بتكاليف الزواج

بلاها شبكة وبلاها نيش..هوجة كدة جات من فترة بعد غلاء اسعار حاجات كتير..لكن لازم نبقي عارفين مين السبب في هذه الزيادات..الأهل رقم واحد طبعا..لان طلبتهم كتير اوي دة أولا ثانيا لازم تبقي العروسة مش أقل من بنت خالتها والكلام الهري دة..صح؟.."أسيوط ميكس كل حاجة والعكس" عاصمة الصعيد الأكثر فقرا والأعلى بتكاليف الزواج  العائلات ترفع شعار «اللى معهوش ما يلزموش».. والعريس يدفع 50ألف جنيه"سلام قبل الكلام".. والشبكة بالكيلو ولا عزاء للجرام..تخيل بقي..يلا خالوا بناتكم تبور..دة الرسول صلي الله وعليه وسلم قال "من ترضون دينه فزوجوه"..


3 أكواب من القهوة يوميا يطيل العمر

نصيحة علي الماشي.. بصراحة يعني أنا اول ما قريت الدراسة دية حسيت بالإنشكاح الفظيع..أصلي أنا من عشقاها الصراحة بفتح عيني علي فنجان منها..المهم بقي دراسة بريطانية أمريكية بتقولك إن  شرب 3 أكواب من القهوة يوميا يطيل العمر..أقعدوا بالعافية...

 

لا توجد تعليقات على الخبر
اضف تعليق