العفاريت!

الأربعاء، 04 أكتوبر 2017 08:00 ص
العفاريت!
محمد الرفاعى يكتب:

¶ أعلن الأزهر أنه سيقود حملة لوقف الاعتداءات على ميانمار! والله فكرتونا بالجماعة بتوع.. عالقدس رايحين.. شهداء بالملايين.
¶ الشيخ عباس شومان وكيل مشيخة الأزهر.. يا ترى لسة شايف أن المفجوع محمد مرسى، يصلح لتولى القضاء؟! ولا ده كان أيام البط بالفريك؟!
¶ وصل إلى مصر بسلام الله الشيخ الطيب المعزاوى المغربى، والذى يستطيع فك جميع الأعمال السفلية، وتزويج المطلقة، وتطليق المتزوجة بعون الله، وإحضار «الحبيب» العادلى فى ثلاث ساعات، بس الحساب عند مين؟!
¶ السيد وزير الداخلية.. بعد تحديث وميكنة السجل المدنى، يستغرق تجديد بطاقة الرقم القومى، من سجل مدنى العجوزة - حفظه الله - ثلاثة أسابيع؟! جايز العفاريت اللى بتطلع فى الصور بدالنا.. كانت واخدة أجازة!
¶ جبالى المراغى رئيس لجنة القوى العاملة بالبرلمان، يؤيد مد فترة الحكم مدى الحياة! وجاى على نفسك ليه يا جبالى يا خويا.. ما تخليها كمان بالمرة عضوية البرلمان، ويبقى زيتنا فى دقيقنا، واللى تعرفه أحسن من اللى ما تعرفهوش!
¶ يا خوفى يا نيبوشا.. ليكون ده آخر عشا!
¶ كل يوم.. ترتفع أسعار الأدوية.. والحكومة.. عندها شلل رعاش لا مؤاخذة، وتفكر فى إنشاء وزارة.. للصحة!
¶ الحاج كوبر وصف نفسه بالمنحوس.. يعنى.. أتلم المنحوس على خايب الرجا!
¶ بعد أن ضرب كوبر الفتة وكتمت على نفسه، دخل مرحلة الحاج متقال! واتفرج عالحلاوة حلاوة.. دى بلدى ونجاوة نجاوة.
¶ حتى لو وصلنا تحت قيادة خالد الذكر كوبر إلى كأس العالم.. هل سنلعب بطريقة.. إعمل حيطة وخد لك ساتر.. واللى يفوت طخه بالنار؟! أم بطريقة ساعدوا العاجز ينوبكم ثواب؟!

 

لا توجد تعليقات على الخبر
اضف تعليق