عن جمال الأربعين

الجمعة، 23 فبراير 2018 06:30 م
عن جمال الأربعين
أمنية عفيفى تكتب:

 
الأربعين هو السن الذي تقف فيه بمنتهي القوة و الثقة بالنفس وتقول كبرت إني أعمل حاجه مش عايز أعملها.
 
الأربعين السن الذي  تراجع  فيه إنجازاتك وإخفاقاتك و تقرر بكامل إرادتك حتكمل و لا لا.
 
الأربعين السن اللى بتكون نضجت فيه و اكتشفت إن ٩٠٪؜ من جدالاتك و حواراتك و مشاكلك كانت على أشياء عديمة الأهمية.
 
الأربعين السن اللي بتحاول فيه بس مش بتعافر، بتجرب فيه بس مش بتنهار.
 
الأربعين السن اللي الفشل فيه ما بيدمركش والنجاح فيه ما بيغركش.
 
الأربعين السن اللي سقف تطلعاتك بيقل لكن سقف أحلامك بيعلى.
 
الأربعين السن اللي بتراجع فيه مسلماتك وأفكارك وترمي نصها في الزبالة وفي نفس الوقت تقدر جدا قيمة النص التاني.
 
الأربعين السن اللي قيمة الفلوس بتقل و قيمة الصحة بتعلي.
 
الأربعين السن اللي مخاوفك من المستقبل بتقل لكن مخاوفك عالمستقبل بتزيد.
 
الأربعين السن اللي علاقاتك الإجتماعية بتتصفي و تنقص أو تزيد.
 
الأربعين السن اللي بتعرف فيه قيمة الحياة وتقدر فيه قيمة الموت.
 
الأربعين السن اللي بتدرك فيه إن سعادتك من جوه مش من بره.
 
الأربعين السن اللي هتقرر فيه تستمتع بسنك ولا تحاربه وتقاومه في معركة خسرانه.
 
الأربعين السن اللي بتقدر فيه الحاجات البسيطة الصغيرة وبتشوفها بميكرسكوب، كلمه حلوة، ابتسامة، هدية أو مفاجأة. 
 
الأربعين السن اللي تكتشف فيه إنك عملت لفة طويلة أوي وفي النهاية رجعت قريب جدا من نقطة البداية، بس مع بعض التغيير التقدير للنقطة اللي رجعت لها. 
 
الأربعين السن اللي بتقدر فيه نفسك بدون غرور، و تحاسبها بدون جلد.
 
الأربعين السن اللي بتدرك فيه إنك فعلا شبه أمك أو أبوك أوالاتنين مع بعض.
 
الأربعين السن اللي بتبتدي تخاف على أهلك بدل ما هما اللي كانوا بيخافوا عليك، الأربعين سن البر.. بروهم.
 
الأربعين سن اليقين، تدرك إنك مهما عملت ومهما حاولت لا تملك إلا أقل القليل بين يديك، فتستمع بحلاوة وجمال اليقين في قضاء وأمر الله. 
 
هذا المقال هدية لكل من في الأربعين أوعلى أعتابها.

 
تعليقات (2)
حبيت الأربعين
بواسطة: Heba
بتاريخ: السبت، 24 فبراير 2018 10:34 ص

مقال جميل خلا الواحد يحب الأربعين .. أما نشوف هنعرف نعمل كده ولا لا

الأربعين سن اليقين
بواسطة: اسراء محفوظ
بتاريخ: الأحد، 25 فبراير 2018 08:36 ص

راااائع

اضف تعليق