ربنا رب قلوب

الأحد، 27 مايو 2018 12:10 ص

بعد رحله طويلة أو قصيرة، اكتشفت ان أسهل الطرق و أجملها للتعامل مع ربنا هي السلاسة و البساطة .. مش التنتفة و لا الحنتفة و لا التنطع ..

اكتشفت ان جدتي البسيطة اللى كانت يادوب بتصلي و تصوم و تعامل ربنا مع الناس أحسن مني بكتير أوي أنا اللى روحت و جيت و قريت و سمعت ..

ربنا طول الوقت كان فى لسانها و فى قلبها ..

و فى وقت من الأوقات كنت بسمع سخرية الناس اللى كنت فى وسطهم من كلمة "ربنا رب قلوب" .. استهزاء و تكشير قال ربنا رب قلوب قال!!! .. و كنت دائماً بفكر ليه جداتى الاتنين كانوا بيقولوا الكلمة دي؟! فى الأول كنت باشفق عليهم لأنهم يا حرام فاكرين ربنا رب قلوب ..

لكن مع الزمن اكتشفت إن حقيقي ربنا رب قلوب .. و ان لما ربنا بيكون فى قلبك ده بينعكس على تعاملاتك مع الناس .. على عباداتك .. و الأهم على ابتلاءاتك..

الناس اللى ربنا فى قلبها فعلا عندها كم سلاسة فى أداء عباداتها غريب .. الأذان يأذن تصلى .. رمضان يجي تصوم .. نعمل خير يالا .. تحصل مصيبه نحمد و نشكر فضله .. ما بيفكروش كتير .. و لا بيحللوا كتير .. و الاغرب و لا بيزعلوا كتير ..

هما على باب الله و فى رحابه و رحمته .. و لعلهم يكونوا فى معيته ..

كلامهم و لسانهم ابسط من البساطة .. مش حتلاقيهم أبدا بيقولولك الحمد لله الذي بنعمته تتم الصالحات .. حتلاقيهم بيقولوا فضل و رضا .. نحمده .. اجر و عافيه .. فى خيره .. داحنا فى عرض رحمته ...

كلامهم قليل بس يلمس قلبك لانه حقيقي طالع من القلب .. تلاقيهم بيقولوا يارب وبس .. لان. باقي الكلام بيكون فى قلبهم

كنت مرة فى الحرم و ست مصرية بسيطة جدا قاعدة جنبى .. كنّا قدام الكعبه بالظبط .. قدام باب الملتزم .. .. قالتلى لو سمحتى يا بنتى أنا مش بعرف أقرأ ممكن تقري لي شويه قران و انا أسمعك .. المهم ابتديت اقرأ و هي تهز رأسها مع كل أيه و تغمض عينيها و تدعي و تسكت .. و تمسك إيدى وتقوللى ورينى كده إنتي بتقري فى أى حتة .. و تحاول تركز تفهم الآيات بتقول أيه ...

قد ايه حسّيت فى اللحظه دى ان انا بمعرفتى للقراية أو التجويد أو حتى فهمى للآيات ولا حاجه جنب الست دى فى جمالها و بساطتها و فهمها ..

هى شايفة ربنا و حاساه و فاهماه بقلبها مش بعقلها ..

بفطرتها مش بعلمها ..

ربنا جوه كل حد فينا ..

ربنا فى قلوبنا مش فى عقولنا ..

كل ما ننضفها هنشوفه أكتر و نحبه أكتر ... و نفهمه أكتر ..

ربنا رب قلوب و فى القلوب .. دور كويس جوه قلبك هتشوفه .. هتعرفه .. و تفهمه .. و تحبه.