فنانات يروين تجاربهن مع التحرش.. هنا الزاهر صورتهم ومدرس الكيميا تحرش بياسمين غيث

الثلاثاء، 07 يوليه 2020 10:46 م
فنانات يروين تجاربهن مع التحرش.. هنا الزاهر صورتهم ومدرس الكيميا تحرش بياسمين غيث

ربما كانت قضية الطالب المتحرش الأخيرة هي الباب الذي شجع الكثير من الظهور والإدلاء بشهادتهم  حول تعرضهم للتحرش، الأمر وصل لـ كثير من النجمات الشابات للتحدث عن تجاربهن مع التحرش سواء فى الوقت الحالى أو فى مرحلة طفولتهن، من بينهم الفنانة هنا الزاهد  التي وثقت لحظة تعرضها للتحرش والمضايقات من أحد السائقين بسيارة نصف نقل أثناء قيادتها سيارتها، موضحة أن السائق وأصدقاؤه استمروا لمدة 5 دقائق فى توجيه كلمات سيئة لها وهربوا فور قيامها تسجيل الواقعة بكاميرا هاتفها.

هنا الزاهد
هنا الزاهد نشرت فيديو عبر ستورى حسابها بموقع إنستجرام، فيديوهات خلال ملاحقتها لسيارة نصف نقل، وأظهر الفيديو بعض الأفراد يجلسون على سيارة نصف نقل، وقالت هنا: متحرشين بيخبوا وشهم وبيجروا لما صورتهم، رجالة أهم، أنا دلوقتى في العربية، الفيديو اللى أنتم شوفتوه الأول لرجالة بشنبات قاعدين في عربية نص نقل كانوا بيجروا ورايا بقالهم 5 دقائق وبيتحرشوا بالكلام وعاملين يكسروا عليا وكانوا بيجروا عليا، أول ما طلعت الموبايل جريوا زى الفران لأنهم فعلا زى الفئران أو كلاب بمعنى أصح، فاكرين لو بنت لوحدها في العربية هتخاف وتقعد تجرى.

هنا الزاهد

"لا أنا مابخافش دول ناس مش محترمة وماتسكتيش على حقك وحق يتجاب دلوقتى عادى جدا وعاوز أقول لأى بنت في عربيتها ماتخفيش طلعى موبايلك وصوريهم هيجروا زى الجبناء وماتسكتيش على حقك".. هكذا قالت هنا.


ياسمين غيث
ولم تكن هنا وحدها هي التي تعرضت للتحرش حيث كشفت الفنانة ياسمين غيث، عن تعرضها للتحرش فى مرحلة الدراسة من أحد المدرسين، مؤكدة أن هذه الواقعة تسببت فى صدمة كبيرة لها مما أدى إلى تركها المدرسة، موجهة النصيحة للأمهات بضرورة سماع بناتهن ودعمهن فى حالة تعرضهن لمثل هذه الحالات.

ياسمين غيث

وقالت ياسمين فى فيديو لها عبر حسابها بموقع "انستجرام :كانت بالنسبالى صدمة كبيرة عشان المدرس كان اكتر حاجة ببصلها باحترام لكن رحت قولت لأمى ورحنا اشتكينا لمدير المدرسة ومفيش اى حاجة حصلت و المدرس سقطنى فى المادة وكانت النتيجة انى مشيت من المدرسة، وعلى فكرة المدرس ده كان متجوز واحدة زى القمر .. مفيش سبب ايا كان لتبرير التحرش.

وأضافت: أنا حصلتلى حادثة وأنا فى تانية ثانوى اذيتنى وعشان كدة انا فكراها لغاية دلوقتى المدرس كان بيدرسلى كيمياء كان سبب انى اكره المادة والمدرسة كان من النوع اللى بيلمس بطريقة مش مريحة و بيعمل ده مع اى بنت وكان معروف ومحدش خد معاه اى إجراء لأنه كان فى منصب كبير فى المدرسة ولما حاول يمسكنى بطريقة مش مريحة مسكتش وهزقته.

وقالت عن قضية التحرش الأخيرة قالت : القضية دى اتعرفت عشان ظهرت على السوشيال ميديا لكن فى كل يوم حوادث بتحصل لبنات وفى منهم اللى حياتهم بتدمر بسبب ده وفى منهم اللى بينتحر وفى اللى بيخاف يتكلم"، مطالبة الفتيات بعدم السكوت على المتحرشين وضرورة تقديم بلاغات للشرطة ضد المتحرشين لاتخاذ الإجراءات القانونية اللازمة ضدهم.

"كل ست فى العالم حصل لها تحرش بطريقة أو بأخرى، وماينفعش تسكتي..قولى ماتسكتيش إتشجعى و إفضحى اللى آذاكى علشان يتأذى هو كمان، حتى لو آذاكى معنويًا فقط".. هكذا أنهت ياسمين حديثها.


سلمي أبو ضيف
بينما كشفت الفنانة الشابة سلمى أبو ضيف، عن تعرضها أكثر من مرة للتحرش فى مرحلة الطفولة، ونشرت فيديو تتحدث فيه عن الأمر قائلة: فى حاجات أنا مريت بيها.. وأنا صغيرة مثلًا دكتور قرر لأن أنا بنت صغيرة وهو محل ثقة عنده الحق إن هو يقرب منى بطريقة مش مريحة ويمسكنى بطريقة مش مريحة، أو سواق الباص بتاع المدرسة يحط إيده على رجلى بطريقة مش لطيفة وحاجات كتير.. لكن أنا قولت لمامتى مثلًا فى قصة الدكتور وعمرنا ما روحنا تانى.

سلمي أبو ضيف

وتابعت: كنت حابة أتكلم فى موضوع الولد اللى اتحرش واغتصب 100 بنت لأن الموضوع ده يهمنى، ويهم كل البنات لأن تقريبا مفيش بنت أعرفها أو معرفهاش متعرضتش لتحرش فى حياتها من وهى صغيرة لحد دلوقتى.. لما جيت اتكلمت مع صحابى قبل كدة، منهم اللى حكالى قصص أنا مش قادرة أصدقها.

مايان السيد

أما الفنانة الشابة مايان السيد كشفت تعرضها للتحرش على يد زميل لها فى أحد أعمالها الفنية ولم تفصح عن اسمه، كما أكدت تعرضها للتحرش منذ عدة سنوات أيضا على يد صديق لها، لافتة أن وقتها لم تكن مدركة لمعنى كلمة "تحرش"، مبدية ندمها على عدم اتخاذ أى إجراء وقتها، وقالت خلال فيديو لها ظهرت به بحالة تأثر شديدة، عبر حسابها بموقع انستجرام :انا مش هسكت تانى واى حد هيقولى كلمة وأنا ماشية فى الشارع هعمل بلاغ انا دلوقتى صوتى بقى مسموع بسبب البنات اللى اتكلمت وحكت عن تجاربها المؤلمة.

مايان السيد

وتابعت باكية: عايزة أحس بأمان، بناشد كل الناجيات اللي كتبوا عن قصتهم مع المتهم بالمتحرش أحمد بسام زكي انهم يقدموا بلاغات عشان يتسجن، عايزة امشى في الشارع احس بامان عايزة افتح تليفوني احس بامان عايزة اشتغل مع رجالة احس بامان وأنا مش حاسة بأمان.

 
لا توجد تعليقات على الخبر
اضف تعليق