سلوى خطاب: "لست عدوة للرجل ورشاقتي سببها هند رستم وأخدت علقت موت في بدايتي" (فيديو)

تصدرت الفنانة سلوى خطاب، مؤشرات البحث بعد الرد على اتهام البعض لها بأنها عدوة للرجل، مشيرة إلى أنها لا تتعامل بهذا المنطق، قائلة:"معرفش الاتهام جه منين، يمكن الستات طلعوه عليا عشان يوقفوا سوقي".

تصريحات سلوى خطاب

وتابعت سلوى خطاب في تصريحات تليفزيونية: "مش ممكن يكون في عداء، المرأة زي الراجل، أنا بعامل بني آدمين، اللي يهمني البني آدم شكله إيه أو البني آدمة شكلها إيه، مينفعش حد يعادي حد.. أنا بحس إن الست المصرية شايلة مهام كتيرة قوي، مطلوب منها فوق طاقتها أكثر من الرجل".

أراء سلوى خطاب

وصدمت سلوى خطاب الإعلامية خلال  حوارها بالبرنامج: "ليا واحدة صاحبتي  لها آراء عكس آرائك كده وطول اليوم المرأة وحقوق المرأة والكلام ده.. وقولتلها أنا مستنية أشوفك متجوزة عشان أشوفك متجرجرة من شعرك وفعلا حصل اتجوزت وأتجرجرت في الريسيبشن من شعرها".

رشاقة سلوى خطاب

وكشفت الفنانة سلوى خطاب، سر حفاظها على رشاقتها، لافته إلى أنها تحاول دائمًا الحفاظ على وزنها، لأنها ضريبة عملها كفنانة.. أنا باكل كل حاجة، بطبخ كل يوم، ومعنديش ممنوعات، باكل حاجة بس مقدار، والسلطات عندي مهمة".

سلوى خطاب وهند رستم

وتابعت سلوى خطاب: "كنت مع الفنانة العظيمة هند رستم، كنا في مهرجان، سألتها عن سر رشاقتها هي وجيلها، وكنا بنلعب رياضة وبناخد تدريبات رقص، وكنا بنحرم نفسنا من الأكل، أنا مكلتش رز إلا بعد ما اعتزلت، و ساعات بسيب نفسي للأكل، لكن هما 3 أو 4 كيلو، مش بسيب نفسي أكتر من كده، لأن لو الوزن زاد عن كده هيكون في صعوبة إن أحاول أرجع تاني".

سلوى خطاب وكواليس دخولها الفن

وحكت الفنانة سلوى خطاب، كواليس دخولها عالم الفن وموقف عائلتها من الالتحاق بهذا المجال والصعوبات التي واجهتها في بداية عملها، و إن جدتها أصرت على دخلوها كلية التجارة، رغم رفضها، ولكنها التحقت بالكلية بالفعل، وأنا في الجامعة قرأت في الجورنال إنهم طالبين دفعة بنات في معهد فنون مسرحية، قلت أنا بحب الفن وهروح أقدم، ونجحت من وراهم، وسحبت ورقي من كلية التجارة وقدمت في معهد فنون مسرحية".

سلوى خطاب وعلقة موت

وواصلت سلوى خطاب: "في يوم تم نشر في الصحافة عني، وأعمامي شافوها وعرفوا، وحصلت مشكلة وخدت علقة موت منهم، وجدتي قالت لي إزاي تعمل كده، حد يسيب كلية تجارة ويروح معهد الرقاصين.. و قلت لها في ناس ولاد عائلات بتدخل المعهد، وأوعدك إن اللي انتي ربيتيني عليها همشي عليه، مش إنت بتحبي أمينة رزق، أنا هكون زي أمينة رزق".

بداية سلوى خطاب

سلوى خطاب اسمها بالكامل (سلوى محمد مرسي خطاب)، ولدت في مدينة القاهرة في عام 1959، وتخرجت من المعهد العالي للفنون المسرحية في عام 1978، و بدأت مسيرتها الفنية بعد ترشيح المخرج هنري بركات لها للمشاركة في فيلم (عشاق تحت العشرين)، لكن نقلتها الكبرى جاءت مع مشاركتها في مسلسل (هند والدكتور نعمان)، ومنذ ذلك الوقت، عملت سلوى خطاب بين السينما والتليفزيون، ومن اعمالها السينمائية: (شوادر، دسوقي أفندي في المصيف، عفاريت الأسفلت، الساحر)، ومن اعمالها التليفزيونية: (رأفت الهجان، الضوء الشارد، حديث الصباح والمساء، نيران صديقة) وغيرهم.