ليلى علوى عن افتتاح المتحف الكبير: حسيت إنى شاهدة على لحظة هتتكتب فى التاريخ
السبت، 01 نوفمبر 2025 09:51 م
عبرت النجمة ليلى علوى عن سعادتها بافتتاح المتحف الكبير، الذى أقيم منذ قليل وسط حضور السيد الرئيس عبد الفتاح السيسى، وعدد من ملوك ورؤساء العالم، حيث كتبت على صفحتها في إنستجرام قائلة:
مش قادرة أوصف إحساسي النهارده…
اللحظة اللي بتخليك تدمع من الفخر، وتحمد ربنا إنك من بلد اسمها مصر
وأنا بتفرج على الأفتتاح… حسيت إني شاهدة على لحظة هتتكتب في التاريخ.
الدموع كانت قريبة، والقلب كان مليان فخر وامتنان.
حسّيت إن كل حجر، كل تمثال، وكل لمحة نور… بتقول للعالم إن مصر ما زالت بتعلم الإنسانية يعني إيه حضارة، ويعني إيه روح ما بتموتش.
المتحف الكبير مش مجرد مبنى… ده روحنا، تاريخنا، وحكاية أجدادنا اللي بنورهم الدنيا لحد النهارده.
اللي اتعمل ده مش بس إنجاز معماري، ده عمل من القلب… من بلد بتحب الحياة والجمال والفن والتاريخ.
وبكل صدق، بشكر فخامة الرئيس عبد الفتاح السيسي على الحلم اللي بقى حقيقة، وعلى الإصرار اللي بيخلي بلدنا دايمًا واقفة شامخة قدام الدنيا كلها
ربنا يحفظك يا مصر، ويبارك في ولادك، ويزيدك أمن وسلام ونور.
وشهد السيد الرئيس عبد الفتاح السيسي، افتتاح المتحف المصري الكبير، والذي يُمثل حدثاً استثنائياً في تاريخ الثقافة والحضارة الإنسانية، حيث أنه من المقرر أن يُشارك في حفل الافتتاح (79) وفدًا رسميًا، بينهم (39) وفدًا برئاسة ملوك وأمراء ورؤساء دول وحكومات، بما يعكس اهتمام المجتمع الدولي بالحضارة المصرية العريقة وبالدور الثقافي والإنساني المتفرد الذي تضطلع به مصر.
وذكر المتحدث الرسمي، أن هذا التمثيل والحضور غير المسبوق لافتتاح أكبر متحف في العالم مخصص لحضارة واحدة يعكس الاهتمام الدولى برؤية الدولة المصرية في الجمع بين عراقة الماضي وإبداع الحاضر وازدهار المستقبل، وليؤكد المكانة الفريدة لمصر كجسر حضاري بين كافة شعوب العالم المحبة للثقافة وللسلام.
