محافظ دمياط لـ"رؤساء المدن: ضيعتوا تعبي (فيديو)

شن الدكتور إسماعيل عبد الحميد طه، محافظ دمياط، هجوما عنيفا على معاونيه من رؤساء المدن والمراكز والوحدات المحلية، خلال اجتماعه الطارئ بهم اليوم بسبب سوء حالة النظافة والتعامل في الأمطار، قائلا: "ضيعتوا تعبي في توفير معدات النظافة بملايين الجنيهات".

 

وعبر محافظ دمياط عن أسفه قائلا: "مفيش رجالة واقفين ورايا وأنا باقف وراكم وفي ظهركم وبفديكم برقابتي ولكن واضح إن العكس مش بيحصل". متابعا: "أنا مستاء بشكل غير مسبوق من مستوى رد الجميل في التعامل مع النوات الشتوية".

 

وقال محافظ دمياط: "في أي ظروف استثنائية كنوات الشتاء تلغي الإجازات، من غير ما أقول، ماينفعش أسأل على رئيس مدينة مالقيهوش، معنديش مشكلة اجيب واحد غيره ،أنا وفرت لكم كل شئ، معدات نظافة ورفعت أجور عمال النظافة، ووفرت كل شئ، ولكنكم خذلتموني، وكل تقارير الجهات المختلفة أكدت سلبيتكم وسوء أدائكم". متابعا: "محدش يقدر ينكر أن فيه جهد مبذول، وفيه انجاز، ولكن مش هسمح لأحد أن يضيع المجهود بسبب الإهمال".

 

 

وأضاف محافظ دمياط: "آيه سوء حالة النظافة والشوارع الغرقانة دى؟؟.. الناس ملهاش ذنب وده تهريج لا يمكن السكوت عليه". وتابع: "إيه موضوع الحصان والحمار اللى كل شوية يموت بسبب اعمدة الانارة ،أنا قولت لكم 100 مرة لابد من صيانة تلك الاعمدة لعدم وجود أى ماس كهربائى يهدد حياه أحد".

 

وتابع محافظ دمياط: "لن أسمح بوجود إشغالات أمام المحلات والمقاهي"، قائلا: "يعنى أيه كل محل يضع أمامه حاجز أو برميل مطالبا بتشديد قيمة محاضر الإشغال 10 أضعاف من أجل إنهاء تلك المشكلة"، مضيفا: "أي مقهى مخالف سيفتتح في أي مركز أو مدينة سأحيل رئيس المدينة أو المركز إلى النيابة العامة وخاصة هناك إجراءات لفتح المقاهى وتراخيص وغيره، ولكن واضح إن القصة دي مش نافعة معاكم".

 

وأردف: "اتحدى إني أوقف أحد فيكم وأسأله عن الخطة الاستثمارية للمحافظة أو المدينة اتنفذت بكام في المائة وباقي منها كام؟".. وحذر: "من النهاردة مفيش حد يقوم بالتوقيع على أي مستند بفورمة"، مشددا على ضرورة التوقيع بالاسم والتاريخ وإلا سأقوم بإحالته الى الشئون القانونية.

 

وأكد محافظ دمياط على أنه سيقوم بإحالة رؤساء المدن والوحدات المحلية إلى الشئون القانونية، وكذلك عن نسب تنفيذ الأعمال وتأخر المستخلصات.

 

وتابع المحافظ: "واضح أن فيه حاجة غلط في مجالس المدن والشئون القانونية في المناقصات"، قائلا: "يعنى إيه كل المناقصات يتم ترسيتها على مقاول واحد.. كده فيه حد بيلعب من تحت التربيزة وانا مش هسكت على كده". وحذر رؤساء المدن قائلا: "هناك حاجة اسمها تقارير عدم صلاحية ومن بكره تقعدوا في بيوتكم". 

وشدد المحافظ أنه سيقطع رقاب كل مقصر بلا استثناء قائلا ايه اللى حصل لكم مفيش دم مفيش اهتمام ايه البرود اللى انتو فيه ده. مضيفا هناك إهمال غير مسبوق من رؤساء القرى لسوء حالة النظافة وتصريف مياه الأمطار، مؤكدا هناك صورا وصلتني من القرى ماترضيش ربنا ولو كان في مدارس كانت بقت كارثة.

وطالب محافظ دمياط رؤساء المدن والمراكز والوحدات القروية بخطوط سير لسيارات القمامة التى تتأخر ولا تقوم بواجبها. كما طالب رؤساء المدن والمراكز بالتفكير وبذل مجهود وقال ده مش معناه إنكم تفضلوا فى الشارع 24 ساعة، أنا عاوز رئيس المسئول اللي يشغل دماغه ومحدش يعتمد أنه شغال موظف في الحكومة بياخد مرتبه أخر كل شهر.

وحذر المحافظ معاونيه قائلا: "دي أخر فرصة لكم أنا صبرت كتير والله ما هعمل الاجتماع ده تاني إلا لما أكون غيرت 20 واحد فيكم".