سما المصري لـ«مرتضى منصور»: «أنا أهلاوية ومحدش يقدر عليا»

عندما بثت الفنان الاستعراضية سما المصرى من خلال قناة «فلول» أغنية سخرت فيها من رئيس نادى الزمالك مرتضى منصور، اندلع وقتها خلاف كبير بين «السياسى والراقصة» ليصل هذا الخلاف إلى أقسام الشرطة والمحاكم بعد أن توعدها «منصور» باغلاق القناة وحبسها ليصدر فى ٢٠١٥، حكما بحبس «المصرى» 6 أشهرو كفالة ألف جنيه وغرامة 10 آلاف جنيه.

 وكشرط حتى يتنازل رئيس نادى الزمالك لها عن القضية اعتذرت له «المصرى» في فيديو مسجل، وفي إعلانٍ مدفوع الأجر في واحدة من الصحف الكبرى!

 ولأن معارك مرتضى منصور ما أن تهدأ حتى تشتعل من جديد ، وعلى أثر الأزمات العديدة التى كان رئيس نادي الزمالك بطلها طوال الأسابيع الماضية ، وهى الأزمات التى شغلت قطاع كبير مهتم بكرة القدم فى مصر ، فقد فاجئت سما المصري الجميع بعدة تصريحات نارية على صفحاتها الموثقة بمواقع التواصل الإجتماعى ومن خلال جروبات معجبيها على «واتس آب» ما دعانا لأن نتوجه إليها بالسؤال التالى«انتى أهلاوية ولا زمالكاوية  وليه رجعتى تنكشى مرتضى منصور »؟

سما المصرى

لتقول «المصري» فى تصريحات لـ«صوت الأمة»:« أنا أهلاوية طبعا وأنا مش فاضيه لمرتضي ولا غيره عشان انكشه كل الموضوع إني لقيت فيديو منتشر ليه علي السوشيال ميديا  بيشكر فيه في الإخوان وبيمدح فيهم وكأنهم ملايكة وانهم فصيل وطني ومظلومين، فعرفت ساعتها وتأكدت هو كان بيهاجمني ليه ومضايق مني عشان كان حبيب الإخوان وبيدافع عنهم وده موجود صوت وصوره».

 تابعت «المصرى» :«يطلع يكدب الكلام ده ،ماكنتش أعرف هو يهاجمني ليه ومضايق أوي كده مني بس لما شفت الفيديو بتاعه وهو بيقول علي مرسي سيبوا الرئيس مرسي يشتغل أخيرا فهمت هو كان يشتمني ليه ،لاني كنت ضد الإخوان، في الوقت اللي كان هو فيه حبيبهم وبيدافع عنهم، وعلي العكس دلوقتي طالع يقول محدش يقول علي مرسي رئيس مرسي عمره ماكان رئيس لا يامرتضي أنت بلسانك قلت قبل كده الريس مرسي، طالع بتغير كلامك دلوقتي عشان الإخوان اتحبسوا لكن أنا كنت أجدع منك، وطلعت نقدتهم في عزهم، في الوقت اللي انت كنت بتدافع عنهم، ولما مشيوا مشيت مع الماشية، ورجعت دلوقتي تشتم فيهم والفيديو بتاعك موجود صوت وصورة، اطلع انفي الكلام ده لو مش صحيح بس هو صحيح، وبرضو أنا أجدع منك».

عندما صرح مرتضى منصور، رئيس نادي الزمالك، بأنه يجهز لصفقة القرن، وأن جماهير الكرة المصرية ستتعرض لحالات الإغماء عند الإعلان عن هذه الصفقة، التى ستهز الوسط الرياضي في البلاد. سخرت الفنانة الاستعراضية سما المصري من رئيس نادى الزمالك حيث نشرت عبر صفحتها الشخصية بموقع تبادل الصور والفيديوهات «إنستجرام» صورة لها بعد فقدانها الكثير من وزنها، قائلة «صباح الخسسان بأه، بجهز فورمة الساحل أهو عملالكوا مفاجأه هتهز مصر، وذي ما قال رئيس الزمالك إنه مجهز صفقة سماها بصفقة القرن هتهز مصر وتخلينا يغمى علينا، ليه ياعم هو احنا حامل ولا إيه؟ وإيه هتهز مصر دي تكونش صافينار؟».وهو ما لاقى تفاعل الآلاف من رواد مواقع التواصل الإجتماعى المختلفين مع سياسة مرتضى منصور بنادى الزمالك .

يذكر أن سما المصرى من خلال قناة فلول التى كانت تبث إبان حكم الجماعة الإرهابية قد اذاعت عدة فيديوهات غنائية ظهرت فيها «المصرى» وهى توجه انتقادات لاذعة لمحمد مرسى وعصابة الإخوان وبعض الناشطين ، ثم قدمت أغنية لمرتضى منصور بعنوان « سيديهاتي في مايوهاتي» !