كنت فين يا فتحي لحد دلوقتي؟

السبت، 13 أبريل 2019 05:55 م
كنت فين يا فتحي لحد دلوقتي؟
هبة العدوي تكتب:

كنت فين يا فتحي لحد دلوقتي؟
 
كنت في الشغل
 
الشغل بيخلص الساعة 5
 
بعده قعدت مع عبده صاحبي ع القهوه شوية
 
آمال مين دينا وليلي دول اممم؟
 
زميلاتي في الشغل دينا ديه عندها 60ستك مدام دينا أهم عميلة وليلي ديع.. أنتي مش حتبطلي العادة الرفت ديه
 
.. أنا بحبك يا فتحي ويغير عليك
 
قصدك بتشكي فيا وفي نفسك.. وتبدأ المعركة.. 
 
تعالي نشوف إيه تأثير ده علي علاقتك بفتحي؟ 
 
الشك في شريك الحياة عموما، هو شيطانه الرجيم.. اللي مفروض كل فتحي وفوزية بيستعيذوا بالله منه.. ليه؟
 
لأن الثقة هي جِدر العلاقة اللي بينكم.. 
 
والمودة والرحمة هما الثمرة..الجِدر بيأمن، والثمرة بتقرب وتربط بينكم.. لكن من غير جدر هل ممكن يبقي فيه كائن حي اسمه حب؟ 
 
والنتيجة هي التعاسة الزوجية المستمرة بلا نهاية.. وفقدان الإحترام مع الطرف الآخر تدريجيا.. ثم فقدان التواصل والخرس الزوجي وصولا للطلاق النفسي تحت نفس سقف البيت الواحد.. 
 
كل ده عشان بفتش وراه في موبايله؟.. آه يا فوزية.. ونفسه لك يا فتحي لو كنت زوج شكاك.. 
 
بس المقال ده تحديدا للفوزية، أهو نعمل اللي علينا كفوزويات والباقي عليك يا فتحي إنك تطمنها وتملي عينيك بيها لوووحدها
*
👈إيه تأثير كونك (جستابو): 
 
1- تدمير الثقة..
 
الثقة مش بتتشاف بالعين المجردة، إنما علميا وعمليا فقدانها بيتشاف في حجم الخناقات اللي بينكم.. 
 
2- تدمير التفهم..
 
التفهم يعني إنك تقدري ظروف فتوحي, لما تلاقيه راجع شايل هموم  الدنيا جواه ومش زي عادته معاكي، حترجعي كل اللي فيه لو كنتي شكاكة لكونه مش بيحبك وبيفكر في واحدة تانية غيرك، فهوووب تديله بوز الغم والنكد وهو أصلا محتاج بس منك طبطبة وتفهم وإحترام مساحته الخاصة.. ولما هو يلاقيكي بتتعاملي معاه بالنكد إستايل طبعا بيفكر في إنك آخر واحدة ممكن يحكي لها عن همومه فيبعد أكتر.. وتفكري إنتي أكتر إنه بيحب غيرك فتخنقيه أكتر فيبعد أكتر ويستمر ويتوغل وينتشر حتي يقتل ونسمع خبر الطلاق لا قدر الله.. 
 
3- لا ثقة، لا حب..
 
يعني عدم ثقتك في فتوحك، يعني علي طول إنك بتطلعي منه أسوأ ما فيه، حنيته اللي إنتي بتشوفيها مع كل الناس، إنسيها .. معاكي حيبقي قاسي وصعب عشان إنتي بتتهميه بأسوأ ما يمكن أن يطلقه عليه إنسان، إنه خاين..
 
👈 ليه بتشكي في جوزك (غير أنهم عموما كتير منهم عينهم زايغة)؟ 
 
1- أهم سبب هو فقدانك لثقتك في نفسك.. إزاي؟ 
 
لما بتفقدي ثقتك في نفسك، بتشكي أصلا في إنك تستاهلي حب جوزك ليكي.. والماساة بتكتمل لو كمان بتحبيه وبتموتي في دباديبه.. لأنك شايفاه كبير أوي وشايفة نفسك قدامه صغيرة.. واجهي نفسك ديه أهم نقطة وصعبة إنك توصلي لها إلا لو كنتي صريحة جدا مع ذاتك.. 
 
2- إحساسك بالتملك.. لا الست ملكت الرجل بعقد الزواج ولا الرجل كذلك.. شعورك بملكيتك له، بيخنقه.. وبيخليكي تعتقدي إنه بتاعك لوحدك وكلام الأغاني والأفلام ده، فالنتيجة إنه بيبعد عنك لأنه حر وما ينفعش حد أصلا يملكه غير ربه.. 
 
*
👈 طيب تعالجي إزاي المشكلة ديه؟ 
 
1- اشتغلي علي نفسك.. طوري منها.. رجّعي لنفسك نظرتك لمرايتك بالثقة.. وإدي لحبك وإهتمامك بيه أجازة شوية يعني ..
 
2- افترضي حسن الظن في الله وجددي علاقتك بيه سبحانه وتعالي.. ثقي إن كل عطاياه لكِ هي خير.. بطلي قلق ..  
 
3- امنعي نفسك تتجسسي علي موبايله أبدا .. لو عايز يخونك حيخونك.. مهما عملتي.. ولو عايزة تطلعي من موبايله حالة تلبس، حتلاقيها أكيد.. 
 
4- طنط فكيهة اللتاتة اللي بترفعي سماعة التليفون تكلميها هيه وبنتها سعاد تحكي لهم عن اللي عمله فتوحك، فيقولولك آه حصل وطبعااا وسمعتي عن زيزي اللي جوزها خانها وتفيدة اللي جوزهاسابها.. ده رزقهم ..إنتي رزقك زوج مختلف ركزي معاه وعليه وعلي سعادتك وإسعاده حتكسبي على الاقل نفسك.. 
 
5- ابعدي شوويتين تلاتة عن فتوحي، بيكرهوا الست المسيطرة جدااا علي فكرة.. ومبيحبوش يحسوا إنهم أطفال مع إننا في كوكب الفوزويات  بتاعنا كلنا عارفين أنهم كده  بس خليها بينا وبين بعض يا ستي😉 بلاش جو الجستابو ده.. رايح فين جاي منين قعدت مع مين ومين اللي كلمتك وعملتلك علي البوست (لاف ) وكدهون .. اللاف للكلام مش له😃.. ولو له خليكي أذكى وواثقة في نفسك قولي ورايا (أنا باكينا وأنا واثقة في نفسي فاكره مني زكي في المسرحية.. أيوووه بالظبط 😂) 
 
وأخيرا حاقولك (سيبي جوزك علي السطوح لو ليكي عمره أبدا ما حايروح ) ما سبق قول ماثور تتناقله الفوزويات جوه الكوكب 😎✋

 
لا توجد تعليقات على الخبر
اضف تعليق