أزمة في مستشفى زايد بمنشأة ناصر بعد تحويلها لعزل صحي.. 1300 مريض وطاقم طبي مصيرهم مجهول (شهادات حية)

الإثنين، 06 أبريل 2020 02:43 م
أزمة في مستشفى زايد بمنشأة ناصر بعد تحويلها لعزل صحي.. 1300 مريض وطاقم طبي مصيرهم مجهول (شهادات حية)
مرضى الفشل الكلوي
كتب- محمد أبو ليلة وأشرف أمين:

- 89 مريض فشل كلوي و1200 مريض ضمور عضلات و14 حالة عناية مركزة مصيرهم مجهول

- غضب بين طاقم التمريض بسبب عدم الاستعانة بهم بعد تحويل المستشفى للحجر الصحي

- مدير مستشفى زايد بمنشأة ناصر: «أمانة المراكز الطبية بوزارة الصحة هي اللي بلغتنا بالقرار وليس لدي معلومات أخرى»
 
تفاجأ العشرات من مرضى الفشل الكلوي بمستشفى الشيخ زايد بمنشأة ناصر صباح اليوم الإثنين بقرار تحويل المستشفى للعزل الصحي، حيث أخبرتهم إدارة المستشفى بأن اليوم هو آخر يوم لعلاجهم ومن صباح الغد عليهم الذهاب لمستشفى أحمد ماهر.
 
وقال عمرو إبراهيم أحد مرضى الفشل الكلوي بالمستشفى في تصريحات صحفية لـ "صوت الأمة": أنا بتعالج في مستشفى الشيخ زايد مريض كلي، بقالي 8 سنين بتعالج في المستشفى إحنا فوجئنا النهاردة بيقولنا أنتو مش هتغسلوا هتروحوا مستشفى أحمد ماهر الساعة 6 وقت الحظر، إحنا و88 حالة فيهم ناس كبار في السن وناس شغالين هنا في المنشية بعيد عن مستشفى أحمد ماهر.
 
وأضاف: هما قالولنا في أماكن في مستشفى أحمد ماهر بس إحنا منعرفش فيه أماكن ولا لأ لأننا لسه مرحناش، المرضى كلهم رافضين يروحوا ومعتصمين أهم حاجة إحنا مش هنسيب مكانا غير لما يكون فيه مكان جديد وملائم مئة بالمئة، وبمواعيد مناسبة لينا، القرار ده فجأة، قالولنا هتغسلوا ومش هتيجوا تاني بكره ولا بعده، إحنا 88 مريض كلى، ده غير في انضم لينا 550 مريض بتوع المخ والأعصاب والناس دي كلها معانا وأهاليهم هما عايزين يخلوا كل الناس دي، مستشفى شايلة على قلبها 3 آلاف مريض، هنروح فين؟.
 
سبب الإخلاء
وأوضحت "منال" أحدى ممرضات وهي مشرفة وحدة الكلي بمستشفى زايد بمنشأة ناصر، في حديث خاص لـ "صوت الأمة" أنه تم إبلاغهم السبت الماضي بتحويل المستشفى للحجر الصحي للفيروس لأطباء جامعة القاهرة، وعلى أساسه سيتم نقل وحدة الكلى بالمستشفى لوحدة كلى أحمد ماهر التخصصي، ومستشفى أحمد ماهر فضوا لينا شفت تالت يخصلوا المرضى بتوعهم، وبعدين إحنا نروح شفت والمعاد سيكون من الساعة 6 مساءاً لـ 11 مساءً، إحنا هندخل هناك بالمرضى بتوعنا، والمكان اللي اتهيأ لينا مواعيده غير مناسبة بالنسبة لأطقم التمريض وكمان غير مناسبة للمرضى.
 
وتابعت: أنا عندي 89 مريض كلى، وعندنا 1800 مريض إم أس أس، بالإضافة لـ 14 لمرضى الرعايات شغالين 24 ساعة، كل دول هيتوزعوا، الإم إس قالوا هيودوهم مستشفى الزيتون، علماً بإن مستشفى الزيتون، فيها حالات كورونا.. إحنا فوجئنا بالقرار أول إمبارح، وإمبارح جالي مسؤل وحدة رعايات الكلي بالوزارة ومعاه كم مسؤول عشان يعرفوا عدد المرضى ويبدأوا يحولوهم.
 
وأضافت: جامعة القاهرة قالت أنا عندي الأطباء بتوعي ومش محتاجة الطاقم الطبي بتاعنا، مش عايزة التخصصات بتاعتكم كل اللي عايزه أرض وحيطان، إحنا دي مستشفي بتاعتي أنا زيي زي ممرضة الجامعة هما عايزين يجيبوا يمدونا بخبرتهم وشغلهم أهلاً وسهلاً أنا ما اعترضناش نشتغل في العزل، إحنا كتبنا الجدول وقسمنا نفسنا ثلاث فرق، طب إحنا هنروح فين، إحنا عندنا تمريض مغترب من المحافظات، والقرار جاي أن المستشفى هتتاخد حظر لمرضى جامعة القاهرة، الدنيا خربانة عندنا هنا تلاتة عيانين أغموا عليهم بسبب القرار".
 
كما قال أحد الممرضين "م.ر"  في تصريحات خاصة لصوت الأمة: الناس دلوقتي عاملة اعتصام في المستشفى، ومش عارفين هيروحوا فين، المرضى والتمريض معتصمين عايزين يمشوا التمريض بيقوللهم خدوا إجازات، الممرضين طالبوا أنهم يشغلوا في المستشفى بعد ما تحولت حجر لكن الإدارة رفضت.
 
ومن جانبه أكد الدكتور ياسر أبو الوفا مدير مستشفى الشيخ زايد، في تصريحات خاصة لـ "صوت الأمة" أن القرار تم اتخاذه من امانة المراكز الطبية من وزارة الصحة، أمس الأحد، موضحا أنه يتم التنسيق حالياً مع المستشفيات لاستيعاب المرضى المتواجدين لديه.
 
وعندما وجهت صوت الأمة له سؤالا عن مصير الأطقم الطبية المتواجدة لديه وهل هناك مستشفيات أخرى تستطيع استيعابهم، قال: "أنا مش هقدر أجاوب على السؤال ده، أمانة المراكز الطبية هي اللي أخذت القرار والدكتور سامح العشماوي مدير الأمانة هو المسؤول".
 
 
WhatsApp Image 2020-04-06 at 2.17.46 PM
 
WhatsApp Image 2020-04-06 at 2.17.47 PM (1)
WhatsApp Image 2020-04-06 at 2.17.47 PM (1)

WhatsApp Image 2020-04-06 at 2.17.47 PM
 
WhatsApp Image 2020-04-06 at 2.17.48 PM (1)
 
WhatsApp Image 2020-04-06 at 2.17.48 PM
 
WhatsApp Image 2020-04-06 at 2.17.49 PM (1)
 
WhatsApp Image 2020-04-06 at 2.17.49 PM
 
WhatsApp Image 2020-04-06 at 2.17.50 PM (1)
 
WhatsApp Image 2020-04-06 at 2.17.50 PM

 

لا توجد تعليقات على الخبر
اضف تعليق